న్యూఢిల్లీ/వాషింగ్టన్: ప్రపంచవ్యాప్తంగా ఎదురుగాలులు వీస్తున్నప్పటికీ బలమైన సేవల కార్యకలాపాల కారణంగా ప్రస్తుత ఆర్థిక సంవత్సరానికి భారత జీడీపీ వృద్ధి 6.3 శాతం ఉండొచ్చని ప్రపంచ బ్యాంక్ ప్రకటించింది. గతంలో వేసిన అంచనానే కొనసాగిస్తున్నట్టు తెలిపింది. గ్లోబల్ మార్కెట్లలో సవాళ్లు ఉన్నప్పటికీ ఇండియా నిలదొక్కుకుంటున్నదని మెచ్చుకుంది. ప్రపంచ బ్యాంకు తన ఏప్రిల్ రిపోర్టులో కూడా 6.3 శాతం జీడీపీ వృద్ధిని అంచనా వేసింది.
2022–-23లో మనదేశం 7.2 శాతం వృద్ధిని నమోదు చేసింది. గత నెలలో, ఆసియా డెవెలప్మెంట్ బ్యాంక్ ప్రస్తుత ఆర్థిక సంవత్సరంలో భారతదేశ వృద్ధి అంచనాను 6.3 శాతానికి స్వల్పంగా తగ్గించింది. ఆర్‌‌బీఐ తాజా అంచనా ప్రకారం 2023-–24లో భారత ఆర్థిక వ్యవస్థ 6.5 శాతం వృద్ధి చెందుతుంది. ఆర్గనైజేషన్ ఫర్ ఎకనామిక్ కో–ఆపరేషన్ అండ్ డెవలప్‌‌మెంట్ తన తాజా నివేదికలో భారతదేశ జీడీపీ వృద్ధి అంచనాను మునుపటి అంచనా 6 శాతం నుంచి 6.3 శాతానికి పెంచింది.
గ్లోబల్ రేటింగ్ ఏజెన్సీ ఫిచ్ భారతదేశ వృద్ధి అంచనాను 6.3 శాతం వద్ద ఉంచగా, ఎస్అండ్ పీ గ్లోబల్ మార్కెట్ ఇంటెలిజెన్స్ మునుపటి అంచనా 5.9 శాతం నుంచి 6.6 శాతానికి పెంచింది. 2023–-24లో వ్యవసాయ రంగం 3.5 శాతం, పరిశ్రమ 5.7 శాతం, సేవలు 7.4 శాతం వృద్ధి సాధించవచ్చని ప్రపంచ బ్యాంకు పేర్కొంది. పెట్టుబడి వృద్ధి 8.9 శాతం వద్ద పటిష్టంగా ఉంటుందని అంచనా.
