స్మార్ట్ ఫోన్ చేతిలో లేకపోతే రోజు గడవని ప్రపంచంలో ఉన్నాం ఇప్పుడు. ఫోన్ కాల్స్, చాటింగ్, మనీ ట్రాన్స్ఫర్, వీడియోలు, ఫొటోలు, మెయిల్స్.. ఇలా ఒకటేంటి బోలెడన్ని అవసరాలు తీరుస్తుంది స్మార్ట్ ఫోన్. కాకపోతే అది చేతిలో భద్రంగా ఉన్నంత సేపే డాటా కూడా సేఫ్. అలాకాకుండా చేతులు మారి వేరే వాళ్ల దగ్గరకి చేరిందో.. డాటా మొత్తం లాగేస్తారు. పర్సనల్ ఫొటోలు, చాట్స్, ఆఫీస్, డబ్బు... ఇలా పర్సనల్ డిటెయిల్స్ అన్నీ వేరేవాళ్ల చేతిలోకి వెళ్లిపోతాయి. అలాకాకుండా ఉండాలంటే... స్మార్ట్ ఫోన్లో ఉండే యాప్స్కి తాళం వేయాలి.
- ఆండ్రాయిడ్ ఫోన్లో... గూగుల్ ప్లే స్టోర్ నుంచి యాప్ లాక్ అనే అప్లికేషన్ డౌన్లోడ్ చేసుకోవాలి.
- ఇన్స్టాల్ చేసుకున్నాక... అది అడిగిన పర్మిషన్స్ ఇవ్వాలి.
- యాప్ లాక్ కోసం... సెట్టింగ్స్కి వెళ్లి పాస్వర్డ్ సెట్టింగ్స్పై ట్యాప్ చేస్తే ఫింగర్ ప్రింట్, ఫేస్ అన్లాక్, కీస్, నెంబర్స్ వంటి ఆప్షన్స్ కనిపిస్తాయి. వాటిలో నచ్చినదాన్ని సెలక్ట్ చేసుకోవాలి.
- యాప్ ఓపెన్ చేసి ప్లస్ (+) బటన్ ట్యాప్ చేయాలి. దాంతో అక్కడ ఫోన్లోని అప్లికేషన్స్ లిస్ట్ కనిపిస్తుంది.
- ఏ యాప్స్కి లాక్ వేయాలనుకుంటే వాటిని సెలక్ట్ చేసుకోవాలి.
- ఆ యాప్స్ సెలక్ట్ చేసుకున్నాక మళ్లీ ప్లస్ (+) బటన్ ట్యాప్ చేస్తే అవన్నీ లాక్ అయిపోతాయి. అంతే ఇక ఆ యాప్స్ ఎవరూ ఓపెన్ చేయలేరు.
- యాప్ లాక్ వాడడానికి ఎలాంటి ఫీజు ఉండదు. యాడ్స్ కూడా రావు. అయితే, ఇలాంటి యాప్స్ ప్లే స్టోర్స్లో చాలానే ఉన్నాయి. వాటిలో బెటర్ యాప్ సెలక్ట్ చేసుకోవడం మీ చేతుల్లోనే ఉంది.
ఫొటోలు, వీడియోలకు...
చాలా స్మార్ట్ఫోన్స్లో ఫొటోలు, వీడియోలను హైడ్ చేసుకునే ఆప్షన్స్ ఉంటాయి. కాకపోతే వాటిని ఎనేబుల్ చేసుకోవడం తెలియాలి. అందుకు ఏం చేయాలంటే.. ఫోన్లో గ్యాలరీలో సెట్టింగ్స్ మార్చుకోవాలి. ఆ ఆప్షన్ ఒక్కో ఫోన్లో ఒక్కోపేరుతో ఉంటుంది. కాబట్టి సెట్టింగ్స్ మెనూకి వెళ్లాక సెక్యూర్ ఫోల్డర్ లేదా ప్రైవేట్ వంటి ఆప్షన్లు చూసి సెలక్ట్ చేసుకోవాలి.
వాట్సాప్లో లాక్తోపాటు హైడ్!
వాట్సాప్లో చాట్లాక్ ఆప్షన్ ఉన్న సంగతి తెలిసిందే. అయితే ఆ లాక్ వేసినట్లు తెలియకుండా ఉండేలా హైడ్ ఆప్షన్ కూడా తీసుకొచ్చింది వాట్సాప్. అదెలాగంటే.. వాట్సాప్లో ఫింగర్ ప్రింట్ లేదా పాస్వర్డ్ లాక్ ఉంటుంది. దీన్ని వాడి చాట్ కనపడకుండా చేయొచ్చు. అందుకోసం చాట్ని లాంగ్ప్రెస్ చేస్తే పైన బాణం గుర్తు కనిపిస్తుంది. దాన్ని సెలక్ట్ చేస్తే ఆ చాట్ ఆర్కైవ్లోకి వెళ్తుంది. దాంతో ఆ చాట్ ఎవరూ చూడలేరు. యూజర్ చూడాలనుకుంటే సెర్చ్బార్లో సెర్చ్ చేయాలి. లేదంటే కిందకి స్క్రోల్ చేసినా కనిపిస్తుంది. దీంతోపాటు ఒక్కో చాట్ని కూడా లాక్ చేసేయొచ్చు. అందుకోసం వాట్సాప్ సెట్టింగ్స్లో ప్రైవసీ ఆప్షన్ సెలక్ట్ చేస్తే మిగతా ఆప్షన్స్ కనిపిస్తాయి. వాటిలో కావాల్సిన దాన్ని సెలక్ట్ చేసుకోవాలి.
