మెరుపు విన్యాసాలు, హోరాహోరీ పోరాటాల నిలయమైన వరల్డ్కప్ పేలవంగా మొదలైంది. టైటిల్ ఫేవరెట్లలో ఉన్న రెండు మేటి జట్ల మధ్య సాదాసీదాగా జరిగిన తొలి పోరులో ఇంగ్లండ్ పై చేయి సాధించింది. సొంతగడ్డ అనుకూలతను ఆసరాగా చేసుకుంటూ బెన్ స్టోక్స్ (79 బంతుల్లో 9 ఫోర్లతో 89; 2/12) చేసిన ఆల్రౌండ్షోకు దక్షిణాఫ్రికా బెంబేలెత్తింది. బౌలింగ్ బలగంతో ఇంగ్లీష్ జట్టును కట్టడి చేసిన సఫారీలు.. బ్యాటింగ్లో మాత్రం కనీస పోరాటం కూడా చేయలేకపోయారు. ఇంగ్లండ్ కుర్ర పేసర్ ఆర్చర్ (3/27) స్వింగ్ దెబ్బకు కుదేలయ్యారు. మొత్తానికి తమ గడ్డపై ఎప్పుడు.. ఎలా ఆడాలో తెలిసిన ఇంగ్లండ్ భారీ విజయంతో మెగా ఈవెంట్లో ఓ అడుగు ముందుకేసింది.
104 పరుగుల తేడాతో ఇంగ్లండ్ గెలుపు
స్టోక్స్, రూట్, రాయ్ హాఫ్ సెంచరీలు ఆర్చర్కు 3 వికెట్లు
లండన్:వరల్డ్కప్లో ఆతిథ్య ఇంగ్లండ్ జట్టు శుభారంభం చేసింది. ఆల్రౌండ్షోతో అదరగొడుతూ.. గురువా రం జరిగిన లీగ్ తొలి మ్యాచ్లో 104 పరుగుల భారీ తేడాతో దక్షిణాఫ్రికాను చిత్తు చేసింది. మోర్గాన్ (60 బంతుల్లో 4 ఫోర్లు, 3 సిక్సర్లతో 57), జేసన్ రాయ్ (54), జో రూట్ (51) అర్ధసెంచరీలు చేయడంతో.. టాస్ ఓడి బ్యాటింగ్ చేసిన ఇంగ్లండ్50 ఓవర్లలో 8 వికెట్లకు 311 పరుగులు చేసింది. తర్వాత బ్యాటింగ్కు దిగిన సౌతాఫ్రికా 39.5 ఓవర్లలో 207 పరుగులకే ఆలౌటైంది. డికాక్(74 బంతుల్లో 6 ఫోర్లు, 2 సిక్సర్లతో 68), డుసేన్ (50) మినహా మిగతా వారు విఫలమయ్యారు. స్టోక్స్ కు ‘మ్యాన్ ఆఫ్ ద మ్యాచ్’ అవార్డు లభించింది.
తాహిర్ తొలి దెబ్బ..
ఊహించని విధంగా తొలి ఓవర్ వేసిన స్పిన్నర్ తాహిర్.. ఇన్నింగ్స్రెండో బంతికే డేంజర్ మ్యాన్ బెయిర్స్టో (0)ను ఔట్ చేసి షాకిచ్చాడు. ఒక పరుగుకే తొలి వికెట్ పడటంతో ఇన్నింగ్స్ను ఆదుకునే బాధ్యతను రాయ్, రూట్ భుజాలకెత్తుకున్నారు. తాహిర్ మూడు ఓవర్లు వేశాకా.. రెండు ఎండ్ల నుంచి ఎంగిడి (3/66), రబాడ (2/66) అటాకింగ్ మొదలుపెట్టారు. అయినా ఇంగ్లిష్ జోడీ ఎక్కడా తడబడలేదు. నిలకడగా బౌండరీలు సాధిస్తూ తొలి 10 ఓవర్లలో 6 రన్రేట్తో 60/1 స్కోరు చేసింది. పవర్ప్లే తర్వాత కూడా ఈ ఇద్దరి జోరు తగ్గలేదు. ఫెహుల్క్వాయో (1/44), ప్రిటోరియస్ బౌలింగ్లోనూ వీళ్లు ఎదురుదాడి కి దిగారు. ఓవర్కు ఓ బౌండరీ చొప్పున బాదుతూ రన్రేట్ తగ్గకుండా చూశారు. దీంతో 17 ఓవర్లలో ఇంగ్లండ్ 100 పరుగులకు చేరింది. అదే క్రమంలో 18వ ఓవర్లో నాలుగు బంతుల తేడాలో రాయ్ (51 బంతుల్లో ), రూట్ (56 బంతుల్లో ) అర్ధసెంచరీలు పూర్తి చేసుకున్నారు. ఇక ఇన్నింగ్స్గాడిలో పడిందనుకునే సమయంలో ఆతిథ్య జట్టును సఫారీ పేసర్లు మళ్లీ దెబ్బకొట్టారు.
4 బంతుల్లో 2 వికెట్లు
నిలకడగా ఆడుతున్న రాయ్.. 19వ ఓవర్లో ఫెహుల్క్వాయో బంతిని భారీ షాట్గా మల్చాడు. కానీ బ్యాట్ టాప్ ఎడ్జ్ తీసుకోవడంతో గాల్లోకి లేచిన బంతిని మిడాఫ్లో డుప్లెసిస్ ఎడమవైపు డైవ్ చేస్తూ కండ్లు చెదిరే రీతిలో అందుకున్నాడు. దీంతో రెండో వికెట్కు 106 పరుగుల భాగస్వామ్యం ముగిసింది. మూడు బంతుల తర్వాత రూట్ ఇచ్చిన క్యాచ్ బ్యాక్వర్డ్ పాయింట్లో డుమిని నేర్పుగా అందుకున్నాడు. ఓవరాల్గా నాలుగు బంతుల వ్యవధి, నాలుగు పరుగుల తేడాలో రెండు వికెట్లు పడటంతో 107/1 స్కోరుతో పటిష్టంగా కనిపించిన ఇంగ్లండ్ 111/3గా మారింది. ఈ దశలో వచ్చిన మోర్గాన్, స్టోక్స్ కుదురుకునేందుకు సమయం తీసుకున్నారు. సఫారీ పేస్–స్పిన్ కాంబినేషన్ పరుగులు నిరోధించడంతో రన్రేట్ తగ్గింది. ఈ ఒత్తిడిని అధిగమించేందుకు ఎంగిడి వేసిన 26వ ఓవర్లో మోర్గాన్ రెండు టవరింగ్ సిక్సర్లు బాదాడు. ఎక్కువగా స్ట్రయిక్ రొటేట్ చేసిన ఈ జంట.. అడపాదడపా ఫోర్లతో ముందుకెళ్లింది. 32వ ఓవర్లో మార్క్రమ్ బౌలింగ్లో 4, 6తో రెచ్చిపోయిన స్టోక్స్, మోర్గాన్.. రన్రేట్ పెంచే ప్రయత్నం చేశారు. మోర్గాన్… 37వ ఓవర్లో తాహిర్ బంతిని లాంగాన్లోకి లేపగా మార్క్రమ్ రన్నింగ్క్యాచ్ అందుకున్నాడు. ఈ ఇద్దరి మధ్య నాలుగో వికెట్కు 106 పరుగుల భాగస్వామ్యం ముగిసింది. 40 ఓవర్లు ముగిసేసరికి ఇంగ్లండ్ 235/4 స్కోరుతో పటిష్టస్థితిలో నిలిచింది. స్టోక్స్ క్రీజ్లో ఉండటంతో 350 స్కోరు ఖాయమని అనుకుంటున్న దశలో సఫారీ బౌలర్లు చెలరేగిపోయారు. పాత బంతిని రెండువైపుల స్వింగ్ చేసిన ఎంగిడి, రబాడ వరుస విరామాల్లో బట్లర్ (18), అలీ (3), వోక్స్(13), స్టోక్స్ వికెట్లను పడగొట్టి భారీ టార్గెట్ను నిరోధించారు.
దక్కని ఆరంభం..
టార్గెట్ ఛేజింగ్లో సౌతాఫ్రికాకు శుభారంభం దక్కలేదు. ఆరంభం నుంచి ఆతిథ్య బౌలర్లు సమష్టిగా చెలరేగడంతో సఫారీ బ్యాట్స్మన్ ఇబ్బందులు ఎదుర్కొన్నారు. నాలుగో ఓవర్లో ఆర్చర్ (3/27) వేసిన బౌన్సర్.. హెల్మెట్కు తాకడంతో ఆమ్లా రిటైర్డ్హర్ట్ అయ్యాడు. డికాక్ నిలకడగా ఆడినా.. మార్క్రమ్ (11), డుప్లెసిస్ (5) స్వల్ప విరామాల్లో ఔటయ్యారు. దీంతో ప్రొటీస్ 44 పరుగులకే 2 వికెట్లు కోల్పోయి ఎదురీత మొదలుపెట్టింది. డికాక్తో జతకలిసిన డుసేన్ను మ్యాచ్ మధ్యలో స్పిన్నర్లు రషీద్, అలీ బాగా కట్టడి చేశారు. బంతి టర్న్ కావడంతో డుసేన్ సింగిల్స్ తీయడంలో ఇబ్బందిపడినా.. డికాక్ మాత్రం ఎదురుదాడి చేశాడు. అలీ, ఫ్లంకెట్ ఓవర్లలో రెండు భారీ సిక్సర్లు బాది 58 బంతుల్లో అర్ధసెంచరీ అందుకున్నాడు. సహచరుడిని చూసి స్ఫూర్తి పొందిన డుసేన్ కూడా 22 వ ఓవర్ (అలీ) 6, 4, 4తో 16 పరుగులు రాబట్టాడు. కానీ తర్వాతి ఓవర్లోనే డికాక్ భారీ షాట్కు ప్రయత్నించి ఔటయ్యాడు. ఫలితంగా మూడో వికెట్కు 85 పరుగుల భాగస్వామ్యానికి తెరపడింది.
నాలుగు బంతుల తేడాలో డుమిని (8), ప్రిటోరియస్ (1) ఔటయ్యారు. దీంతో 129/2తో ఉన్న ప్రొటీస్15 పరుగుల తేడాలో 3 కీలక వికెట్లు కోల్పోయి 144/5తో కష్టాల్లో పడింది. 56 బంతుల్లో అర్ధసెంచరీ చేసిన డుసేన్ పోరాటం మొదలుపెట్టినా.. 32వ ఓవర్లో ఆర్చర్ దెబ్బకు వెనుదిరిగాడు. ఉన్నంతసేపు వేగంగా ఆడిన ఫెహుల్క్వాయో (24) కూడా ఎక్కువసేపు వికెట్ కాపాడుకోలేకపోయాడు. ఇక రిటైర్డ్హర్ట్నుంచి తిరిగొచ్చిన ఆమ్లా (13) ఫామ్ను కొనసాగించలేకపోయాడు. రబాడ (11) పూర్తి ఒత్తిడితో బ్యాటింగ్ చేశాడు. ఈ ఇద్దరు స్ర్టయిక్ రొటేట్ చేసే సాహసం కూడా చేయకపోవడంతో చేయాల్సిన రన్రేట్ పెరిగిపోయింది. ఈ క్రమంలో ఫ్లంకెట్ (2/37) ఓ షార్ట్ బంతితో ఆమ్లా వికెట్ తీయడంతో సఫారీల పరాజయం ఖాయమైంది. చివర్లో ఎంగిడి (6 నాటౌట్) సిక్స్తో జోరు తెచ్చినా.. 40వ ఓవర్లో స్టోక్స్ (2/12) డబుల్ స్ర్టోక్ ఇచ్చాడు. వరుస బంతుల్లో రబాడ, తాహిర్(0)ను ఔట్చేసి ఇన్నింగ్స్కు ముగింపు పలికాడు.