డాక్టర్లు దేవునితో సమానం అంటారు. ఎందుకంటే ప్రాణంపోసే ఈ వృత్తికి అంత గొప్ప స్థానముంది కాబట్టి. అలాంటి వృత్తిలోని ఓ డాక్టర్కు ఇటీవలే గిన్నిస్ రికార్డు దక్కింది. అందులో స్పెషల్ ఏముంది అనుకుంటున్నారా? ఉంది. ఎందుకంటే వందేండ్లు వచ్చినా ఇప్పటికీ పేషెంట్లను చూస్తున్న డాక్టర్ ఆయనే మరి. పేరు హోవార్డ్ టక్కర్. ఈయన సొంతూరు.. అమెరికాలోని ఒహియో రాష్ట్రంలో ఉన్న క్లీవ్లాండ్ సిటీ. 1922 జులై 10న పుట్టిన టక్కర్..1947లో ఎంబీబీఎస్ చదివాడు.
అదే సంవత్సరం అమెరికా నేవీలో న్యూరాలజిస్ట్గా చేరాడు. కొరియా యుద్ధంలో అమెరికా సైన్యంలో డాక్టర్గా పనిచేశాడు. తిరిగొచ్చాక సొంతూరులోని ఓ హాస్పిటల్లో చేరాడు. అప్పటి నుంచి75 ఏండ్లుగా అదే వృత్తిలో ఉన్నాడు. అంతేకాదు, అక్కడి మెడికల్ కాలేజీలో వారానికి రెండుసార్లు పాఠాలు కూడా చెప్తున్నాడు. అందుకే ఇటీవల ఆయన వందో పుట్టినరోజుకు ఐదుగురు అమెరికా మాజీ ప్రెసిడెంట్స్ విషెస్ చెప్తూ లెటర్స్ కూడా రాశారు.