టీచర్లు.. బడిలో అమ్మలా ప్రేమని పంచుతారు. నాన్నలా మన భవిష్యత్తు గురించి ఆలోచిస్తారు. ఓ మంచి ఫ్రెండ్లా గైడ్ చేస్తారు. తోబుట్టువుల్లా ధైర్యాన్ని నింపుతారు. సొసైటీలో ఎలా నడుచుకోవాలో నేర్పిస్తారు. వీటన్నింటికి బదులుగా మన ఎదుగుదలని మాత్రమే కోరుకుంటారు. అదే వాళ్లకి సంతోషం.. అలా మన జీవితంలో కీ రోల్ పోషించిన గురువులందర్నీ ఈ టీచర్స్ డే రోజున జ్ఞాపకాల పెట్టె తెరిచి పలకరించొద్దామా!
జోవియల్, మూడీ, కాస్త కన్ఫ్యూజన్, స్ట్రిక్ట్ .. క్లాస్ రూమ్లోనే కాదు ఆ క్లాసులు చెప్పే టీచర్లూ ఒక్కొక్కరు ఒక్కోలా ఉంటారు. వాళ్ల గురించి చెప్పాలంటే.. ముందు ఫేవరెట్ నుంచి మొదలుపెడదాం.
- ప్రతి స్టూడెంట్ లైఫ్లో ఒక ఫేవరెట్ టీచర్ ఉంటారు. ఆ ఇష్టానికి కారణం ఆ ఫలానా మాష్టారు చెప్పే పాఠాలే కాదు.. వాళ్ల పర్సనాలిటీ కూడా. ఎప్పుడూ స్టూడెంట్స్ని కడుపుబ్బా నవ్విస్తుంటారు ఈ ఫేవరెట్ టీచర్లు. ఫస్ట్ బెంచ్ సుకన్య నుంచి మొదలుపెట్టి, చివరి బెంచ్ మీద చివరాఖర్న కూర్చున్న సుదేశ్ వరకు అందర్నీ పలకరిస్తారు. పిల్లలతో ఓ ఫ్రెండ్లా కలిసిపోతారు. పాఠాలతో పాటు అన్ని విషయాలు చెప్తారు. అందుకే వీళ్లు చాలామందికి ఫేవరెట్.
- క్లాస్ రూమ్ గుమ్మం నుంచే పాఠం మొదలుపెట్టే టీచర్లు ప్రతి ఒక్కరి లైఫ్లో ఉంటారు. పీరియడ్ ముగిసినా.. వీళ్ల పాఠం వినబడుతూనే ఉంటుంది. ఏ టీచర్ సెలవులో ఉన్నా వాళ్ల పీరియడ్ టైంకి క్లాసులో దూరిపోతారు. కొన్ని సార్లు వేరే టీచర్లని బతిమాలి మరీ క్లాసులు తీసుకుంటారు. పొరపాటున వీళ్ల క్లాసు లాస్ట్ అవర్లో వచ్చిందో.. ఇక అంతే. మార్కులు తక్కువొస్తే బెత్తం దెబ్బలు, పాఠం గుర్తుంచుకోకపోతే గుంజీలు. ఇవన్నీ చూసి ‘ఈ సర్/మేడమ్ బాగా స్ర్కిక్ట్ అని అప్పుడు తప్పించుకొని తిరిగినా.. ఇప్పుడు ఆలోచిస్తే మన భవిష్యత్తు కోసం వాళ్లు పడ్డ ఆరాటమే కనిపిస్తుంది.
- ‘ఇన్నేండ్ల సర్వీస్లో నేను చూసిన వేస్ట్ బ్యాచ్ మీరే’ అంటూ మొదలుపెడతారు ఫ్రస్ట్రేషన్ టీచర్లు. ‘మీరు దేనికీ పనికిరారు’ అంటూ తిడుతుంటారు. వందకి తొంభై తొమ్మిది మార్కులొచ్చినా స్టూడెంట్ని మెచ్చుకోరు. కొన్నిసార్లు ఇంకా బాగా చదవాలని మార్కులు తగ్గించి వేస్తుంటారు కూడా.
- రోజూ బెత్తం పట్టుకొని క్లాసుకి వస్తారు కొందరు టీచర్లు. ప్రశ్నలకి జవాబు చెప్పలేదో మీ పని అంతే అంటూ భయానికే భయం పుట్టిస్తారు. కానీ, ఏ రోజూ ఆ బెత్తానికి పని చెప్పరు వీళ్లు. పరీక్షల్లో మార్కులు తక్కువొచ్చినా.. ‘ఇంకోసారి మంచి మార్కులు రాకపోతే’ అంటూ బెదిరిస్తారే తప్ప పనిష్మెంట్ ఇవ్వరు. ఎవరైనా ఇబ్బంది పడుతున్నా చూడలేరు. వీళ్ల వీక్ పాయింట్ తెలిసిన స్టూడెంట్స్ రోజుకో సాకుతో వీళ్లని మభ్యపెడుతుంటారు.
- లెక్కల టీచర్ హోంవర్క్ ఎక్కువ ఇచ్చినా.. సోషల్ సార్ ఆటల టైంలో ఎక్స్ట్రా క్లాసు తీసుకున్నా ఊరుకోని పీఇటీ టీచర్లు ఉంటారు. పిల్లలకి చదువు ఎంత ముఖ్యమో ఆటలు, పాటలు కూడా అంతే ముఖ్యం అన్నది ఈ టీచర్ల వాదన. జీవితంలో ఎదురయ్యే సమస్యల గురించి..వాటిని ఎలా ఫేస్ చేయాలి.. లాంటి విషయాలు చెప్తుంటారు. వీళ్లు ప్రతి సందర్భంలో ఇన్స్పైర్ చేస్తుంటారు. ఇలా మన జీవితంలో అడుగడుగునా అండగా నిలిచిన గురువులందరికీ ఈ టీచర్స్ డే రోజున స్పెషల్ థ్యాంక్స్ చెప్పుకుందాం.