సిద్దిపేట, వెలుగు : తెలంగాణ కోసం ఉద్యమించని కాంగ్రెస్ నేతలు ఇప్పుడు ఓట్ల కోసం బయలుదేరారని, వారి చేతికి అధికారాన్నిస్తే రాష్ట్రం కుక్కలు చింపిన విస్తరి అవుతుందని మంత్రి హరీశ్రావు అన్నారు. మంగళవారం సిద్దిపేటలో నిర్వహించిన రోడ్ షోలో మాట్లాడుతూ సిద్దిపేట ప్రజలే తన కుటుంబమనుకుని పనిచేస్తున్నానని, ఇక్కడి ప్రజలకు మేలు జరగాలన్నదే తన తపన అని అన్నారు.
‘ప్రజల మనసులోని ఆలోచనలకు అనుగుణంగా అభివృద్ధి అనే ఐదేండ్ల పరీక్ష రాశాను. అ పరీక్ష మార్కులు మీరే వేయండి’ అని కోరారు. మన సిద్దిపేట మట్టిబిడ్డ కేసీఆర్ ముఖ్యమంత్రిగా ఉన్నందువల్లే సిద్దిపేటలో ఇంతటి అభివృద్ది సాధ్యమైందన్నారు. ఈ సందర్భంగా నర్సాపూర్ చౌరస్తా నుంచి లాల్ కమాన్, గాంధీ చౌక్, విక్టరీ టాకీస్ చౌరస్తా, భారత్ నగర్, గణేశ్నగర్, మెదక్ రోడ్డు మీదుగా పాత బస్టాండు వరకు రోడ్ షో నిర్వహించారు.
