చేతగాకుంటే రాజీనామా చేసి..  దళితుడిని సీఎం చెయ్

V6 Velugu Posted on Sep 15, 2021

  •  సీఎం కేసీఆర్​పై షర్మిల ఫైర్​.. హనుమకొండలో నిరుద్యోగ నిరాహార దీక్ష
  •  ఉద్యోగాలియ్యకుండా ఎంతమందిని పొట్టనపెట్టుకుంటరని నిలదీత

హనుమకొండ, వెలుగు: రాష్ట్రంలో ఉద్యోగాలను భర్తీ చేయకుండా ఇంకా ఎంత మంది నిరుద్యోగులను పొట్టనపెట్టుకుంటారని, ఇంకెంత మంది తల్లులకు కడుపుకోత మిగుల్చుతారని సీఎం కేసీఆర్​పై వైఎస్సార్​టీపీ చీఫ్​ వైఎస్​ షర్మిల మండిపడ్డారు. రాష్ట్రంలో కొత్త జిల్లాలు, మండలాలన్నీ కలిపి 3.85 లక్షల ఉద్యోగ ఖాళీలున్నాయని, వాటన్నింటినీ భర్తీ చేయాలని ఆమె డిమాండ్​ చేశారు. ఇంటికో ఉద్యోగం ఇవ్వలేనప్పుడు కనీసం నిరుద్యోగ భృతైనా ఇవ్వాలని,  లేదంటే సీఎం పదవికి రాజీనామా చేసి దళితుడిని ఆ సీట్లో కూర్చోబెట్టాలని డిమాండ్​ చేశారు. మంగళవారం ఆమె హనుమకొండలోని బాలసముద్రం హయగ్రీవాచారి గ్రౌండ్​లో నిరుద్యోగ నిరాహారదీక్ష చేశారు. అంతకుముందు కాకతీయ యూనివర్సిటీ నుంచి గ్రౌండ్​ వరకు ఆమె పాదయాత్రగా తరలివచ్చారు. జాబ్​ నోటిఫికేషన్లు రావట్లేదన్న బాధతో సునీల్​ నాయక్​ ఆత్మహత్య చేసుకున్నాడని, కానీ, ఇంతవరకూ ఆయన కుటుంబాన్ని మాత్రం కేసీఆర్​ ఆదుకోలేదని షర్మిల విమర్శించారు. సునీల్​ సోదరుడికి ఉద్యోగం ఇప్పిస్తానని చెప్పిన కేసీఆర్​.. ఇప్పటికీ పట్టించుకున్న పాపాన పోలేదని మండిపడ్డారు. ప్రగతి భవన్​లోని బాత్రూంలకూ సీఎం కేసీఆర్​ బుల్లెట్​ ప్రూఫ్​ పెట్టుకున్నాడని, తన ప్రాణాలకు అంత విలువనిచ్చుకునే కేసీఆర్​కు నిరుద్యోగుల ప్రాణాలంటే విలువలేదా అని నిలదీశారు. తెలంగాణ వస్తే ఉద్యోగాలు వస్తాయని నమ్మించి.. ఇప్పుడు విద్యార్థులను బలిపీఠమెక్కిస్తున్నాడని విమర్శించారు. 
ఎన్నికలుంటేనే పథకాలు
ఎన్నికలుంటేనే సీఎం కేసీఆర్​ పథకాలను తెస్తారని, అది ఆయన నైజమని షర్మిల మండిపడ్డారు. కేసీఆర్​ పాలనలో వరంగల్​ రోడ్ల మీద పడవలు వేసుకుని వెళ్లాల్సిన పరిస్థితులున్నాయన్నారు. వరంగల్​ను డల్లాస్​, వాషింగ్టన్​ చేస్తానన్న కేసీఆర్​.. వరదల్లో మునిగేలా చేశాడన్నారు. టెక్స్​టైల్​ పార్క్​ కోసం తట్టెడు మట్టినీ ఎత్తిపోయలేదన్నారు. సీఎం ప్రయత్నించకపోవడం వల్లే కాజీపేటకు కోచ్​ ఫ్యాక్టరీ రాలేదన్నారు. ప్రపంచానికి ఎందరో మేధావులను అందించిన కాకతీయ యూనివర్సిటీ ఇప్పుడు.. ఖాళీ యూనివర్సిటీ అయిందన్నారు. రుణమాఫీ చేయకపోవడం వల్ల రైతులపై మిత్తి భారం పడుతోందన్నారు. రైతుబంధు కింద రూ.5 వేలిచ్చి.. ఇన్సూరెన్స్​, పెట్టుబడి, సబ్సిడీల కింద రూ.15 వేలు కొట్టేస్తున్నాడని ఆమె మండిపడ్డారు.

Tagged unemployment, CM KCR, YS Sharmila,

Latest Videos

Subscribe Now

More News