- చెల్లించేందుకు సర్కారు గ్రీన్ సిగ్నల్
- కుటుంబానికి రూ.18 లక్షలు 2,850 కుటుంబాలకు లబ్ధి.. పరిహారం కోసం ఏండ్లుగా పోరాటం
- పాలమూరు – రంగారెడ్డి స్కీంకు తొలుగుతున్న అడ్డంకులు
హైదరాబాద్, వెలుగు: పాలమూరు- రంగారెడ్డి ఎత్తిపోతల ప్రాజెక్టుకు అడ్డంకులు ఒక్కొక్కటిగా తొలగిపోతున్నాయి. ఇప్పటికే ఆ ప్రాజెక్టుకు పర్యావరణ అనుమతులకు లైన్ క్లియర్కాగా.. తాజాగా ఉద్ధండాపూర్రిజర్వాయర్ పరిహారం సమస్య కూడా తీరిపోయింది. పరిహారం విషయంలో నిర్వాసితులు కొన్నేండ్లుగా ఆందోళన చేస్తున్నారు.
పోలేపల్లి నిర్వాసితులకు ఎకరాకు రూ.12.50 లక్షలు ఇచ్చి.. తమకేమో రూ.6.5 లక్షలే ఎట్లా ఇస్తారంటూ ఉద్ధండాపూర్ గ్రామస్థులు ఆందోళనకు దిగుతున్నారు. అంతేకాకుండా.. జాయింట్ ఫ్యామిలీస్కు పదహారున్నర లక్షల నుంచి రూ.18 లక్షలు, సింగిల్ఫ్యామిలీస్ కూడా రూ.6 లక్షల నుంచి రూ.18 లక్షలకు పెంచారు.
మొత్తంగా ఉద్ధండాపూర్ నిర్వాసితులకు రూ.146 కోట్ల మేర పరిహారం చెల్లించేందుకు ప్రభుత్వం గ్రీన్ సిగ్నల్ ఇచ్చింది. గతంలోనే కొంత డబ్బు అందజేసిన ప్రభుత్వం తాజాగా పూర్తి డబ్బులను నిర్వాసితులకు అందజేసేందుకు నిర్ణయించింది. దానికి సంబంధించిన ఫైలుపై సీఎం రేవంత్ సంతకం చేసినట్టు తెలిసింది.
ఉద్ధండాపూర్ రిజర్వాయర్ నిర్మాణంలో భాగంగా 2,850 కుటుంబాలు తమ భూములను కోల్పోతున్నాయి. అందులో జాయింట్ ఫ్యామిలీస్ 1,846.. సింగిల్ ఫ్యామిలీస్ 1,004 ఉన్నాయి. ఇటు ఒకే చోట ఉన్న భూములన్నింటికీ ఒకే రకమైన పరిహారం ఇచ్చేందుకు సర్కారు అంగీకరించినట్టు చెబుతున్నారు.
అప్రైజల్ లిస్టులో చేర్చేలా చర్యలు
పాలమూరు రంగారెడ్డి ప్రాజెక్టు డీపీఆర్ను నిరుడు సెంట్రల్ వాటర్ కమిషన్ (సీడబ్ల్యూసీ) అప్రైజల్ లిస్టు నుంచి తప్పించిన సంగతి తెలిసిందే. దీనిపై కొద్ది రోజుల క్రితం సీడబ్ల్యూసీ చైర్మన్ అతుల్ జైన్ను ఉన్నతాధికారులు కలిశారు.
అప్రైజల్ లిస్టు నుంచి తొలగించిన నిర్ణయాన్ని వెనక్కు తీసుకోవాలని, ప్రాజెక్టును అప్రైజల్ లిస్టులో చేర్చాలని కోరారు. మైనర్ ఇరిగేషన్లో ఆదా చేసిన 45 టీఎంసీల జలాల లెక్కలను వివరించి.. అప్రైజల్ ఇవ్వాలని విజ్ఞప్తి చేశారు. అందుకు సీడబ్ల్యూసీ చైర్మన్ అతుల్ జైన్ సానుకూలంగా స్పందించారు. త్వరలోనే దీనిపై రివ్యూ చేస్తామని అధికారులకు అతుల్ జైన్ చెప్పినట్టు తెలిసింది. కాగా, ప్రాజెక్టును మైనర్ ఇరిగేషన్లో వినియోగించుకోని 45 టీఎంసీలు, గోదావరి డైవర్షన్ ద్వారా మరో 45 టీఎంసీలను కలిపి ప్రాజెక్టుకు 90 టీఎంసీలు కేటాయించారు.
అయితే, మైనర్ ఇరిగేషన్ లెక్కలపై క్లారిటీ లేదని, దానికి సంబంధించిన వివరాలు ఇవ్వాలని గత బీఆర్ఎస్ సర్కార్తో పాటు ఇటు కాంగ్రెస్ సర్కారుకూ సీడబ్ల్యూసీ లేఖలు రాసింది. స్పందన లేకపోవడంతో నిరుడు అప్రైజల్ లిస్టు నుంచి తప్పించింది. తాజాగా ఈ అడ్డంకి కూడా త్వరలోనే తొలగిపోయేందుకు మార్గం సుగమమైంది.
