చివరిరోజు సర్పంచ్ స్థానాలకు.. 20వేలకుపైగా నామినేషన్లు

• తొలి విడత నామినేషన్ల పర్వం
• వార్డు స్థానాలకు 51 వేలకు పైగా దాఖలు.. 
• నేడు పరిశీలన.. తిరస్కరణకు గురైతే అప్పీల్‌‌కు వెళ్లే చాన్స్ 
• ఉపసంహరణకు డిసెంబర్ 3 మధ్యాహ్నం 3 గంటల దాకా గడువు
• నేటి నుంచే రెండో విడత నామినేషన్లు షురూ..
• 6న నామినేషన్ల ఉపసంహరణ.. అదేరోజు అభ్యర్థుల జాబితా 

హైదరాబాద్, వెలుగు: పంచాయతీ ఎన్నికల తొలి విడత నామినేషన్ల పర్వం ముగిసింది. శనివారం చివరిరోజు అభ్యర్థులు భారీగా నామినేషన్లు దాఖలు చేశారు. చివరిరోజు సర్పంచ్​ స్థానాలకు 20వేలకు పైగా నామినేషన్లు దాఖలు కాగా.. వార్డు స్థానాలకు 51వేలకుపైగా మంది నామినేషన్లు వేశారు. ఈ ప్రక్రియ 3  రోజులు కొనసాగింది. ఆర్వోలు సాయంత్రం 5 వరకు నామినేషన్లు స్వీకరించారు. రాష్ట్రవ్యాప్తంగా మొదటి విడతలో 4,236  పంచాయతీలకు, 37,440 వార్డులకు డిసెంబర్​ 11న ఎన్నికలు జరుగనున్నాయి.

నేడు నామినేషన్ల పరిశీలన 

తొలివిడత గ్రామ పంచాయతీ ఎన్నికల నామినేషన్ల దాఖలు ప్రక్రియ శనివారంతో ముగియగా..  ఆదివారం నామినేషన్ల పరిశీలనకు అధికారులు ఏర్పాట్లు పూర్తి చేశారు. సాయంత్రం 5 గంటల తర్వాత  స్క్రూటినీ పూర్తయ్యాక  చెల్లుబాటయ్యే అభ్యర్థుల జాబితా రెడీ చేస్తారు.  తిరస్కరణ నామినేషన్లపై అప్పీలు చేసుకునే అవకాశం కల్పించారు. సర్పంచ్‌‌, వార్డు మెంబర్‌‌ అభ్యర్థి నామినేషన్‌‌ తిరస్కరణకు గురైతే  అభ్యర్థి సంబంధిత రెవెన్యూ డివిజనల్‌‌,  సబ్‌‌ కలెక్టర్‌‌ వద్ద రిటర్నింగ్‌‌ అధికారి నిర్ణయంపై అప్పీలు చేసుకోవచ్చు. నామినేషన్ల పరిశీలన తేదీ మరుసటి రోజు నామినేషన్ల తిరస్కరణపై అప్పీలు దాఖలు చేసుకోవచ్చు. మరుసటిరోజే ఆ అప్పీలును సంబంధిత అధికారి పరిష్కరిస్తారు.  తిరస్కరించిన నామినేషన్లపై  డిసెంబర్​ఒకటిన సాయంత్రం వరకు అప్పీల్ చేసుకోవచ్చు. డిసెంబర్​ 2న అప్పీల్​పరిశీలిస్తారు.  డిసెంబర్​ 3న  మధ్యాహ్నం3 గంటల వరకు నామినేషన్ల ఉపసంహరణకు గడువు ఉంది. అదేరోజు మధ్యాహ్యం 3 గంటల తర్వాత బరిలో నిలిచిన అభ్యర్థుల జాబితాను అధికారులు ప్రకటిస్తారు.  

 నేటి నుంచి రెండో విడత నామినేషన్లు..

రెండో విడతలో 4,333 పంచాయతీలు, 38,350 వార్డులకు ఆదివారం నోటిఫికేషన్​ జారీ కానుంది. మరుక్షణం నుంచి నామినేషన్లు స్వీకరిస్తారు. డిసెంబర్ 2 వరకు నామినేషన్లు స్వీకరణ,   డిసెంబర్​ 3న  పరిశీలన, వీటిపై వినతులకు 4 వరకు అవకాశం, 5న స్క్రూటినీ ఉంటుంది. 6న నామినేషన్ల ఉపసంహరణ.. అదేరోజు అభ్యర్థుల జాబితా వెల్లడిస్తారు. 14న పోలింగ్ ఉంటుంది. అదేరోజు విజేతలను ప్రకటిస్తారు.

పల్లెరణం.. ఆసక్తికరం!

• తొలి విడత పంచాయతీ ఎన్నికల పోరు రసవత్తరంగా మారుతున్నది. పదవి వదులుకొని ఒకరు.. ఇందిరమ్మ ఇల్లు, పథకాలు అందడంలేదని మరొకరు.. తల్లీకూతళ్లు, అత్తాకోడళ్లు, ఒకే కుటుంబంలో అన్నదమ్ములు పోటీ పడడం ఆసక్తిగా మారింది.  
• సూర్యాపేట జిల్లా కోదాడ మండలం గుడిబండ గ్రామం నుంచి సర్పంచ్‌‌గా పోటీ చేసేందుకు  పులి వెంకటేశ్వర్లు అనే వ్యక్తి  ఎస్సై  ఉద్యోగానికి రాజీనామా చేశారు. 
•  జగిత్యాల జిల్లా కోరుట్ల మండలం తిమ్మయ్యపల్లి  పంచాయతీ కొత్తగా ఏర్పడగా.. సర్పంచ్ పదవి కోసం మాజీ సర్పంచ్ రాజారెడ్డి భార్య శివరాత్రి గంగవ్వ, వారి కూతురు పల్లపు సుమలత నామినేషన్లు వేశారు. 
• కరీంనగర్ జిల్లా గంగాధర మండలం లక్ష్మీదేవిపల్లి గ్రామ యువకుడు జంగిలి మహేందర్  వెయ్యి రూపాయి నాణేలతో వెళ్లి నామినేషన్ దాఖలు చేశారు. గతంలో వార్డుమెంబర్‌‌‌‌గా  పోటీచేసి ఒక్క ఓటుతో ఓడిపోయారు. 
• మెట్‌‌పల్లి మండలం సత్తెక్కపల్లి గ్రామానికి చెందిన భార్యాభర్తలు భీమనవేణి మహేశ్​, ఆయన భార్య మానస.. ఇందిరమ్మ ఇండ్లు, సంక్షేమ పథకాలు అర్హులకు అందడంలేదని నిరసన తెలుపుతూ సర్పంచ్, వార్డు మెంబర్‌‌‌‌ పదవులకు నామినేషన్ దాఖలు చేశారు.