ఏకగ్రీవం కోసం జోరుగా ప్రయత్నాలు.. హామీలు గుప్పిస్తున్న సర్పంచ్ ఆశావహులు

• కొన్నిచోట్ల వేలం నిర్వహిస్తున్న ఉదంతాలు
• దృష్టిపెట్టిన జిల్లా పోలీసులు

సిద్దిపేట, వెలుగు: పంచాయతీ ఎన్నికల వేళ గ్రామాల్లో రసవత్తర రాజకీయం మొదలైంది. కొందరు ఏకగ్రీవాల కోసం, మరికొందరు గ్రామస్తుల మద్దతు కోసం ప్రయత్నిస్తున్నారు. జగదేవ్ పూర్ మండలంలోని 3 గ్రామాల్లో ఏకంగా వేలం నిర్వహించగా మరికొన్ని చోట్ల గ్రామాభివృద్ధి కోసం పెద్దల వద్ద చెక్కులను పెడుతున్న ఉదంతాలు వెలుగులోకి వస్తున్నాయి. జగదేవ్ పూర్ మండలంలోని బీజీవెంకటాపూర్​లో  సర్పంచ్ పదవిని ఆశిస్తున్న చుక్కల పరుశరామ్​ ఏకగ్రీవం చేసుకోవడానికి  వేలం నిర్వహించి  రూ.13.50 లక్షలు ఇవ్వడానికి సిద్ధమయ్యాడు. 

ఇది నచ్చని ఇద్దరు వ్యక్తులు పోటీగా నామినేషన్​ దాఖలు చేయడంతో వారిని బుజ్జగించేందుకు మధ్యవర్తులు ప్రయత్నాలు మొదలుపెట్టారు. అనంతసాగర్​లో క్యాసారం కుమార్ ను​ సర్పంచ్ గా ఏకగ్రీవ తీర్మానం చేస్తే  రూ.15 లక్షలు గ్రామాభివృద్ధికి ఇచ్చేందుకు సిద్ధమయ్యారు. మండల పరిధిలోని కొండాపూర్, మందాపూర్, నిర్మల్​నగర్, అంతాయిగూడ  గ్రామాల్లో  సర్పంచ్​ ఆశావహులు ఏకగ్రీవం కోసం ప్రయత్నిస్తున్నారు. 

పోలీసుల రంగ ప్రవేశం

ఏకగ్రీవాల కోసం వేలం నిర్వహిస్తున్న నేపథ్యంలో పోలీసులు రంగ ప్రవేశం చేశారు. సర్పంచ్ పదవి కోసం వేలం నిర్వహించకుండా చట్ట బద్ధంగా ఏకగ్రీవం చేసుకునే విషయంపై గ్రామాల్లో అవగాహన కల్పిస్తున్నారు. వేలం నిర్వహించడం చట్ట విరుద్ధమని సీపీ విజయకుమార్ ప్రకటించడమే కాకుండా కఠిన చర్యలు తీసుకుంటామని హెచ్చరించారు. 

జగదేవ్ పూర్ మండలంలో సీఐ మహేందర్ రెడ్డి ,  తహసీల్దార్​ నిర్మల, ఎస్ఐ కృష్ణారెడ్డి  కొండాపూర్, మాందాపూర్, పలుగు గడ్డ, బీజీ వెంకటాపూర్, అనంతసాగర్ గ్రామాల్లో పర్యటించారు. ఏకగ్రీవం చేసేందుకు డబ్బులు, ఇతర ప్రలోభాలు చూపవద్దని సూచించారు. నామినేషన్లు వేయకుండా బెదిరింపులకు దిగితే కఠిన చర్యలు 
తీసుకుంటామన్నారు. 

ఆరు నెలల ముందే ఏకగ్రీవం

జగదేవ్ పూర్ మండలం పలుగుగడ్డ పంచాయతీ సర్పంచ్, ఉప సర్పంచ్ పదవులకు ఆరు నెలల కింద గ్రామస్తులు ఏకగ్రీవ తీర్మానం చేసుకున్నారు. గ్రామంలో మొత్తం  జనాభా 450  ఉండగా అందులో 300 మంది ఓటర్లుంటారు. వారిలో మెజార్టీ ఒకే కులస్తులు కావడంతో గ్రామంలో గుడి నిర్మాణానికి స్థలమిచ్చిన వారినే ఏకగ్రీవంగా ఎన్నుకోవాలని నిర్ణయించారు. ఇందుకు అంగీకరించి గుడి నిర్మాణానికి 12 గుంటలు ఇవ్వడానికి ముందుకు వచ్చిన గ్రామానికి చెందిన నర్ర కనకయ్య ను సర్పంచ్ గా, నర్రా రాజ్ కుమార్ ను ఉప సర్పంచ్ గా ఏకగ్రీవంగా ఎన్నుకున్నారు. 

ప్రస్తుతం ఈ గ్రామ పంచాయతీ సర్పంచ్ స్థానానికి ఎవరు నామినేషన్ దాఖలు చేయలేదు.  గ్రామ పంచాయతీ ఎస్సీ మహిళకు రిజర్వ్ కావడంతో ఎర్రోళ్ల రాజు కుటుంబ సభ్యులు పోటీ చేయాలని నిర్ణయించుకున్నారు. ఇందుకోసం రూ.లక్ష ఖర్చు చేసి గ్రామంలోని రోడ్లపై గుంతలను సిమెంటు, కంకరతో మరమ్మతు చేయించారు. బెజ్జంకిలో సర్పంచ్​ పదవిని ఆశించిన పెద్దన్న రోడ్లపై గుంతలు పూడుస్తూ తన అభ్యర్థిత్వానికి మద్దతు ఇవ్వాలని కోరుతున్నారు.