- సీఎం రేవంత్రెడ్డిని తప్పుపట్టడానికి లేదు: దత్తాత్రేయ
ముషీరాబాద్, వెలుగు: సీఎం రేవంత్ రెడ్డి మంచికో చెడుకో బీసీలకు 42 శాతం రిజర్వేషన్ల బిల్లును అసెంబ్లీలో పాస్ చేశారని మాజీ గవర్నర్ బండారు దత్తాత్రేయ అన్నారు. ఇక రిజర్వేషన్ విషయంలో పార్లమెంటుదే అంతిమ నిర్ణయమని, సీఎం, రాష్ట్ర ప్రభుత్వాన్ని తప్పు పట్టడానికి ఏమీ లేదన్నారు. బీసీ సంక్షేమ సంఘం ఆధ్వర్యంలో రాబోయే ఎంపీటీసీ, జెడ్పీటీసీ ఎన్నికలు, ఉద్యోగ రంగాల్లో 42% బీసీ రిజర్వేషన్లపై చర్యలు చేపట్టాలని డిమాండ్ చేస్తూ శనివారం ఇందిరా పార్క్ ధర్నా చౌక్లో ధర్నా చేపట్టారు.
ఈ సందర్భంగా దత్తాత్రేయ మాట్లాడుతూ.. బీసీలకు 42% రిజర్వేషన్లు ఎందుకు అమలుకావడం లేదనే దానిపైనే ప్రధానంగా చర్చజరగాల్సిన అవసరం ఉందన్నారు. ఆర్ కృష్ణయ్య మాట్లాడుతూ.. రాజకీయ ప్రయోజనల కోసమే బీసీల మధ్య చిచ్చు పెడుతున్నారని విమర్శించారు. 42% రిజర్వేషన్లు అమలు చేయాలనే చిత్తశుద్ధి ప్రభుత్వానికి లేకపోవడమే ఈ దుస్థితికి కారణమని మండిపడ్డారు. చట్టసభల్లో రిజర్వేషన్లు సాధించేవరకు పోరాటం చేయాలని పిలుపునిచ్చారు. జాజుల శ్రీనివాస్ గౌడ్ మాట్లాడుతూ.. బీసీలకు రావాల్సిన వాటా రాకుండా చేసే కుట్రలను కొనసాగిస్తున్నారని మండిపడ్డారు. ఈ కార్యక్రమంలో ఎర్ర సత్యనారాయణ, జస్టిస్ చంద్రకుమార్, కోలా జనార్దన్, అడ్వకేట్ జేఏసీ నాయకుడు శ్రీనివాస్, గుజ్జ కృష్ణ తదితరులు పాల్గొన్నారు.
