- జవహర్నగర్లో రెండుగా చీలిపోయిన నేతలు
- పార్టీ కార్యక్రమాల్లో ఎవరికి వారే విడిగా పాల్గొంటున్న నాయకులు
- అయోమయంలో కార్యకర్తలు
జవహర్ నగర్, వెలుగు: మేడ్చల్ సెగ్మెంట్లోని కాంగ్రెస్ నేతలు రెండు వర్గాలుగా చీలిపోయారు. ఎవరికి వారే విడిపోయి పలు కార్యక్రమాల్లో పాల్గొంటున్నారు. దీంతో అయోమయానికి గురవుతున్న కార్యకర్తలు ఏ వర్గంతో కలిసి వెళ్లాలో తేల్చుకోలేకపోతున్నారు. డబుల్ బెడ్రూం ఇండ్ల పంపిణీలో అక్రమాలు జరుగుతున్నాయని, వాటిని స్థానికులకే ఇవ్వాలని కాంగ్రెస్ పార్టీ రాష్ట్ర ఉపాధ్యక్షుడు వజ్రేశ్ యాదవ్ గత నెల 26న తన వర్గంతో కలిసి జవహర్నగర్లోని అంబేద్కర్ చౌరస్తా వద్ద ధర్నాకు దిగారు. ఈ కార్యక్రమానికి పీసీసీ అధికార ప్రతినిధి, మేడ్చల్ సెగ్మెంట్ కో ఆర్డినేటర్ సింగిరెడ్డి హరివర్ధన్ రెడ్డిని సైతం ఆహ్వానించారు. అయితే, హరివర్ధన్రెడ్డి హాజరుకాలేదు. అదేరోజు వజ్రేశ్ యాదవ్ ఆందోళన చేపట్టకముందే ఉదయం హరివర్ధన్ రెడ్డి తన వర్గంతో కలిసి జవహర్నగర్లోని అరుంధతి కాలనీలో నిర్మించిన డబుల్ బెడ్రూం ఇండ్ల ముందు నిరసన చేపట్టారు.
ఒకే సమస్యపై ఒకే రోజు కాంగ్రెస్కు చెందిన ఈ ఇద్దరు నాయకులు వేర్వేరుగా ఆందోళనలు, నిరసనలు చేపట్టడంతో పార్టీ స్థానిక నాయకులు, కార్యకర్తలు తలలు పట్టుకుంటున్నారు. ఈ ఇద్దరు నాయకులు పార్టీ నుంచి మేడ్చల్ సెగ్మెంట్ స్థానం టికెట్ ఆశిస్తూ ఎవరికి వారే కార్యక్రమాలు చేపడుతున్నారు. ఈ వర్గపోరు కారణంగా కింది స్థాయి క్యాడర్ అయోమయానికి గురవుతోంది. ఎవరితో కలిసి వెళ్లాల్లో తేల్చుకోలేకపోతోంది. సమస్యపై కలిసి పోరాడితేనే పార్టీకి గుర్తింపు ఉంటుందని గుర్తించాల్సిన నాయకులే ఇలా వ్యవహరిస్తున్నారని విమర్శలు వ్యక్తమవుతున్నాయి.
