సర్కారు బడి పిలుస్తోంది.. బడిబాట కార్యక్రమం ప్రారంభించిన ప్రభుత్వ టీచర్లు

• ప్రభుత్వ పాఠశాలల్లో విద్యార్థుల సంఖ్య పెంచడమే లక్ష్యంగా ప్రచారం
• ప్రభుత్వ స్కూల్స్​లో రిజల్ట్​ పెరగడంతో తల్లిదండ్రుల ఆలోచనలో మార్పు

మహబూబాబాద్, వెలుగు: సర్కారు బడుల్లో విద్యార్థుల సంఖ్య పెంచడానికి రాష్ర్ట ప్రభుత్వం ముందస్తు బడిబాట కార్యక్రమాన్ని ప్రారంభించింది. ఈసారి ప్రభుత్వ పాఠశాలల్లో బెస్ట్​ రిజల్ట్స్​ రావడంతో ప్రతి ఏడాది జూన్​లో షురూ అయ్యే బడిబాట ప్రోగ్రామ్​ఈనెల 9న మొదలుపెట్టారు. రాష్ర్ట విద్యాశాఖ ప్రభుత్వ ఉపాధ్యాయులను అలర్ట్​ చేయడంతో ముందస్తు బడిబాట కార్యక్రమాన్ని విస్తృతం చేశారు. ప్రస్తుత విద్యా సంవత్సరంలో మేలో ప్రతి శుక్రవారం 9, 16, 23, 30 చేపట్టగా, జూన్ 6న మెగా ప్రోగ్రామ్​ను రాష్ట్రంలో అన్ని ప్రభుత్వ  పాఠశాలలలో నిర్వహించనున్నారు. 

గ్రామాల్లో ప్రచారం విస్తృతం..

కరపత్రాలు, బ్యానర్లు, సర్కారు స్కూల్స్​లో చదవడం ద్వారా ఉపయోగాలు, అనుభవజ్ఞులైన టీచర్స్, ఉచిత యూనీఫామ్స్, పుస్తకాలు, మధ్యాహ్న భోజనం ఇలా అన్ని ప్రయోజనాలను ప్రజలకు వివరిస్తూ ప్రైవేట్​కు ధీటుగా ప్రభుత్వ స్కూల్స్​ టీచర్లు ప్రచారం చేస్తున్నారు. తమ స్కూల్​పదో తరగతి విద్యార్థులు సాధించిన వివరాలను తల్లిదండ్రులకు చెబుతూ గవర్నమెంట్​ బడిలో విద్యార్థులు చేర్పించేలా ప్రోత్సహిస్తున్నారు. గ్రామపంచాయతీ, జన సమీకరణ ఉన్న ప్రాంతాల్లో స్వయం సహాయక బృందాల సభ్యులు, అమ్మ ఆదర్శ పాఠశాల కమిటీలు, పిల్లల తల్లిదండ్రులు, అంగన్ వాడీల సహకారంతో బడిబాట కార్యక్రమాన్ని ముమ్మరం చేశారు. 

ఉమ్మడి వరంగల్​ జిల్లా పరిధిలో 

ఉమ్మడి వరంగల్​ జిల్లాలోని మహబూబాబాద్ జిల్లా​ 775, వరంగల్​ 530, హనుమకొండ 467, జనగామ 460, జయశంకర్​ భూపాలపల్లి 416, ములుగు 331 ప్రభుత్వ స్కూల్స్​లో బడిబాట కార్యక్రమాన్ని నిర్వహిస్తున్నారు. ప్రభుత్వ పాఠశాలల హెచ్ఎంలతోపాటు ఉపాధ్యాయులు బడిబాట కార్యక్రమంలో ఉత్సాహంగా పాల్గొంటూ విద్యార్థులను చేర్పించేలా తల్లిదండ్రులను ప్రోత్సహిస్తున్నారు. ఈ ఏడాది ప్రభుత్వ పాఠశాలల్లో మంచి ఫలితాలు రావడంతో తల్లిదండ్రులు కూడా సర్కారు బడుల్లో పిల్లలను చేర్పించేందుకు ముందుకు వస్తున్నారని బడిబాట కార్యక్రమంలో పాల్గొన్న వారు చెబుతున్నారు.

గవర్నమెంట్​స్కూల్స్​లో చేర్పించండి..

బడీడు పిల్లలందరినీ ప్రభుత్వ స్కూల్స్​లో చేర్పించాలి. ప్రభుత్వ స్కూల్స్​లోనే అనుభాజ్ఞులైన ఉపాధ్యాయులు ఉన్నారు. సమష్టి కృషితో పదో తరగతి ఫలితాల్లో జిల్లాను రాష్ట్రంలోనే అగ్ర స్థానంలో నిలిపాం. ప్రభుత్వ స్కూల్స్​లోనే పదో తరగతిలో విద్యార్థులు అత్యుత్తమ మార్కులు సాధించారు. పేద, మధ్యతరగతి ప్రజలు ప్రైవేట్​ మోజులో పడి ఫీజులు కట్టలేక ఇబ్బందులు పడుతున్నారు. తల్లిదండ్రులు విజ్ఞతతో ఆలోచించి సర్కారు బడుల్లోనే తమ పిల్లలను చేర్పించాలి. టీచర్లు మరింత అంకిత భావంతో పని చేసేలా చర్యలు చేపడుతాం.-రవీందర్​రెడ్డి, డీఈవో, మహబూబాబాద్​