కరోనా టైమ్లో పోలీసుల సేవలు విలువైనవి

• గవర్నర్​ జిష్ణు దేవ్ వర్మ 
• కరోనా టైమ్​లో పోలీసుల సేవలను  వివరిస్తూ రాసిన ‘ది ఎక్స్​ట్రా మైల్’ ఆవిష్కరణ

హైదరాబాద్​ సిటీ, వెలుగు:  కోవిడ్-19 మహమ్మారి సమయంలో సైబరాబాద్ పోలీసులు, సొసైటీ ఫర్ సైబరాబాద్ సెక్యూరిటీ కౌన్సిల్ సేవలను వివరిస్తూ రాసిన ‘ది ఎక్స్​ట్రా మైల్’ పుస్తకం కళ్లకు కట్టిందని గవర్నర్ జిష్ణు దేవ్ వర్మ అన్నారు. డీజీపీ శివధర్ రెడ్డి, అడిషనల్ డీజీ (లా అండ్ ఆర్డర్) మహేశ్​భగవత్ తో  కలిసి గవర్నర్​ ముఖ్య అతిథిగా పాల్గొని ఈ పుస్తకాన్ని ఆవిష్కరించారు. ఈ సందర్భంగా గవర్నర్​ మాట్లాడుతూ కోవిడ్ లాక్​డౌన్ సమయంలో సైబరాబాద్ పోలీసులు, ఐటీ నిపుణులు, వలంటీర్లు చేసిన అసాధారణ సేవలను ఈ పుస్తకం వివరిస్తుందన్నారు. 

12.50 లక్షల ఫుడ్​ప్యాకెట్లు, 1.40 లక్షల నిత్యావసర కిట్లు పంపిణీ చేశారని, 6 లక్షల ఐటీ ఉద్యోగులకు వర్క్ ఫ్రమ్ హోమ్ సౌకర్యం కల్పించడం, 18 వేల యూనిట్ల ప్లాస్మా సేకరణ, ఒక్క రోజులో 38 వేల మందికి వ్యాక్సినేషన్ అందించి ప్రపంచ రికార్డు సృష్టించడం, వీధి కుక్కలకు ఆహారం పెట్టి చేసిన సేవలు ఈ పుస్తకంలో చోటు చేసుకున్నాయన్నారు. తర్వాత డీజీపీ, ఏడీజీపీ మాట్లాడారు. ప్రముఖ శాస్త్రవేత్త, మాజీ రాష్ట్రపతి అబ్దుల్ కలాం పుస్తక సహ రచయిత డాక్టర్ అరుణ్ తివారీ, ఎస్సీఎసీ మాజీ ప్రధాన కార్యదర్శి కృష్ణ యెదుల కలిసి ఈ పుస్తకం రచించారన్నారు. ఎక్స్‌‌ట్రా మైల్ వరకు సైబరాబాద్ పరిణామం, కరోనా సవాలును ఎదుర్కొన్న విధానాన్ని రచయితలు సమగ్రంగా వివరించినట్టు తెలిపారు.