- స్పష్టం చేసిన హైకోర్టు
హైదరాబాద్, వెలుగు: జీవో 887 ప్రకారం కారుణ్య నియామకాలకు ఏడాదిలోపే దరఖాస్తు చేసుకోవాలని హైకోర్టు స్పష్టం చేసింది. ఏడాది తర్వాత దరఖాస్తు చేసుకుంటే నియామకాలు చేయాలని ఉత్తర్వులు జారీ చేయబోమని స్పష్టం చేసింది. శ్రీ కొండా లక్ష్మణ్‌ తెలంగాణ ఉద్యానవన విశ్వవిద్యాలయంలో పనిచేస్తున్న తన భర్త 2011 ఏప్రిల్‌ 2న మరణించడంతో కారుణ్య నియామకం కింద ఉద్యోగం ఇవ్వాలని కోరుతూ 2013 మార్చిలో మహబూబాబాద్‌కు చెందిన కె. భాగ్యలక్ష్మి విశ్వవిద్యాలయానికి అప్లికేషన్‌ పెట్టుకున్నారు.
ఆమె దరఖాస్తును వర్సిటీ తిరస్కరించడంతో హైకోర్టును ఆశ్రయించారు. ఆమెకు ఉద్యోగం ఇవ్వాలంటూ సింగిల్‌ జడ్జి 2025లో తీర్పు చెప్పారు. ఈ తీర్పును రద్దు చేయాలంటూ యూనివర్సిటీ దాఖలు చేసిన అప్పీల్‌ పిటిషన్‌ను చీఫ్‌ జస్టిస్‌ ఆపరేశ్‌ కుమార్‌ సింగ్, జస్టిస్‌ మొహియుద్దీన్తో కూడిన డివిజన్‌ బెంచ్‌ విచారించింది. సింగిల్‌ జడ్జి తీర్పును రద్దు చేసింది.
భాగ్యలక్ష్మి.. దరఖాస్తును 2013లో చేస్తే వర్సిటీ తిరస్కరించిందని.. అయితే, అప్లికేషన్‌ 2011లో చేశానని భాగ్యలక్ష్మి చెబుతున్న వాదనలకు ఆధారాలు చూపలేదని పేర్కొంది. భర్త మరణించిన ఏడాదిలోగానే దరఖాస్తు చేసుకోవాల్సి ఉందన్న యూనివర్శిటీ వాదనతో కోర్టు ఏకీభవించింది.
