- బిల్డర్చొరవ, అదనపు నిధులతో గుడ్ క్వాలిటీ.. గ్రాండ్ లుక్
- ప్రతీ బ్లాక్ ముందు గార్డెన్.. ఎటు చూసినా గ్రీనరీ
- అండర్ గ్రౌండ్ డ్రైనేజీ, సీసీ రోడ్లు, స్ట్రీట్ లైట్లు
- సకల సౌలతుల ఇండ్లతో లబ్ధిదారుల్లో సంబురం
కామారెడ్డి, వెలుగు : సర్కారు కట్టిస్తున్న డబుల్ బెడ్రూం ఇండ్ల పేరు చెప్తే.. కుంగిన పిల్లర్లు, నాసిరకం స్లాబులు,ముట్టుకుంటే కూలిపోయేలా ఉండే పిట్టగోడలు, ఇండ్ల చుట్టూ నిలిచే నీళ్లు, మొలిచిన ముండ్ల కంపలే గుర్తుకొస్తాయి. కానీ, కామారెడ్డి జిల్లా భిక్కనూరు మండలం జంగంపల్లిలో కట్టిన డబుల్ బెడ్రూం ఇండ్లు మాత్రం వెరీవెరీ స్పెషల్. సర్కారు ఇచ్చిన పైసలు చాలక అన్నిచోట్ల బిల్డర్లు నాసిరకంగా నిర్మిస్తే, ఇక్కడ పనులు చేసిన బిల్డర్ తిమ్మయ్యగారి సుభాష్రెడ్డి జేబులోంచి మరిన్ని నిధులు ఖర్చు పెట్టి మరీ సకల సౌలతులతో ఇండ్లు కట్టించాడు. దీంతో ఇక్కడి డబుల్ బెడ్రూం ఇండ్ల కాలనీ అచ్చు గేటెడ్ కమ్యూనిటీని తలపిస్తోంది. ప్రతి బ్లాక్ ముందు గార్డెన్తో ఎటు చూసినా గ్రీనరీతో ఆకట్టుకుంటోంది.
అండర్ గ్రౌండ్ డ్రైనేజీ, చుట్టూరా సీసీ రోడ్లు, స్ట్రీట్లైట్లతో వెలిగిపోతోంది. దీంతో ఇక్కడి లబ్ధిదారులు ఫుల్ఖుష్ అవుతున్నారు. కామారెడ్డి నియోజకవర్గంలోని జంగంపల్లికి 50 డబుల్ బెడ్రూం ఇండ్లు శాంక్షన్ అయ్యాయి. హైవే పక్కన ఉన్న జాగలో వీటిని కట్టాలని ఎమ్మెల్యే గంప గోవర్ధన్ నిర్ణయించారు. నిర్మాణ బాధ్యతను బీబీపేట మండలం జనగామకు చెందిన బిల్డర్ తిమ్మయ్యగారి సుభాష్రెడ్డికి అప్పగించారు.
అప్పటికే సొంత ఫండ్స్తో బీబీపేటలో హైస్కూల్ కట్టిన సుభాష్రెడ్డి, తన సొంతూరు జనగామలో 52, జంగంపల్లిలో 50 ఇండ్లను కూడా మోడల్ కాలనీగా నిర్మించాలని నిర్ణయించారు. కానీ, సర్కారు ఇచ్చిన ఫండ్స్తో అది సాధ్యం కాదని భావించి, సొంతంగా మరికొన్ని నిధులు సమకూర్చారు. ప్రభుత్వం నుంచి ఇండ్ల నిర్మాణం, సౌలతుల కోసం రూ. 3.64 కోట్లు శాంక్షన్ కాగా,బిల్డర్ సుభాష్ రెడ్డి సొంతంగా ఒక్కొక్క చోట సుమారు రూ. కోటి రూపాయలు భరించడంతో గేటెడ్ కమ్యూనిటీ తరహాలో డబుల్ఇండ్లు రెడీ అయ్యి, రిచ్లుక్లో మెరిసిపోతున్నాయి.
సకల సౌలతులు..
గేటెడ్ కమ్యూనిటీ మోడల్లో 6 బ్లాకుల్లో 50 ఇండ్లు నిర్మించారు. ఒక్కో బ్లాక్ మధ్య కొంత స్థలం వదిలారు. ప్రతీ బ్లాక్ ముందు గార్డెన్ ఉంది. పచ్చిగడ్డి, మొక్కలు పెంచారు. చుట్టూరా స్థలం వదలడంతో గాలి, వెలుతురు ధారాళంగా వస్తోంది. లోపల గ్రానైట్ వేశారు. కిచెన్కు గ్రానైట్ రాళ్లు వాడారు. కిటీకీలు పీవీసీ(పాలీవినైల్ క్లోరైడ్)తో చేయించారు. హైవే నుంచి లోపలి వరకు సీసీ రోడ్డు, చుట్టూరా సీసీ రోడ్డు వేశారు. ట్రాన్స్ఫార్మర్ నుంచి ప్రతి ఇంటికీ అండర్ గ్రౌండ్ కరెంట్ సౌకర్యం కల్పించారు. అండర్ గ్రౌండ్ డ్రైనేజీ సిస్టమ్ కూడా ఉంది. మోరీ నీళ్లు ఎక్కడా బయట కనిపించవు. స్ర్టీట్ లైట్లు ఏర్పాటు చేశారు. హైవే పక్కన ఉండడంతో అటుగా వెళ్లే ప్రతీ ఒక్కరిని ఆకర్షిస్తున్నాయి.
సమాజానికి మేలు చేయాలనే సకల హంగులు
ఎమ్మెల్యే సూచనతో జనగామ, జంగంపల్లిలో నిర్మిస్తున్న ఇండ్లను తెలంగాణలోనే మోడల్గా తీర్చిదిద్దాం. వీటిని చూసిన వారు మిగతా ఏరియాల్లో కూడా ఇలా కట్టడానికి ముందుకొస్తారని భావించాం. పేదలకు అన్ని రకాల సౌలతులతో గేటెడ్ కమ్యూనిటీని తలపించేలా నిర్మించాం. లాభాపేక్ష లేకుండా ప్రభుత్వం కేటాయించిన నిధులకు అడిషనల్గా సొంతంగా డబ్బులు పెట్టుకున్న. ఈ ఇండ్లలో ఉండే లబ్ధిదారులకు ఎలాంటి ఇబ్బందులు లేకుండా అన్ని రకాల వసతులు కల్పించాం.
- తిమ్మయ్యగారి సుభాష్రెడ్డి, బిల్డర్
ఇంత మంచిగ కడ్తరనుకోలే!
గవర్నమెంట్ కట్టించే ఇండ్లంటే మామూలుగా ఉంటాయని అనుకుంటం. కానీ మా కోసం కట్టిన డబుల్ ఇండ్లు మంచిగున్నయ్..ఇట్ల కడ్తరనుకోలే. సిటీ ఇండ్లలాగా కనిపిస్తుంటే సంబురమనిపిస్తంది.
- బాలకిషన్, లబ్ధిదారుడు