పడవల మీద, పుట్టీల మీద నది దాటడం చూశాం. అయితే గిన్నిస్ రికార్డ్ సాధించాలంటే వెరైటీగా ఆలోచించాలి. ఈ పెద్దాయన అదే చేశాడు. గుమ్మడి కాయతో చేసిన పడవలో ఎక్కువ దూరం జర్నీ చేసి గిన్నిస్ రికార్డ్ల్లోకి ఎక్కాడు. అది కూడా తన అరవయ్యో పుట్టిన రోజున. సాహసం చేయాలనే కోరిక ఉండాలే కానీ వయసు అడ్డంకి కాదని చాటిన ఈయన పేరు డ్యూనే హన్సెన్.
ఉండేది అమెరికాలోని నెబ్రస్కా రాష్ట్రంలో.
పోయిన నెల 27వ తేదీన అరవై ఏండ్ల పుట్టిన రోజు చేసుకున్నాడు హన్సెన్. ఈయన రైతు. తమ పెరట్లో గుమ్మడికాయలు, సొరకాయలు సాగు చేసేవాడు. తన 60వ పుట్టినరోజు ఎప్పటికీ గుర్తుండిపోయేలా క్రేజీగా ఏదైనా చేయాలనుకున్నాడు. అప్పుడే ఈయనకు గుమ్మడికాయ పడవ జర్నీ గుర్తుకొచ్చింది. 2018లో 41 కిలోమీటర్లు జర్నీ చేసి గిన్నిస్ రికార్డ్ సాధించాడు రికీ స్వెన్సన్. ఎలాగైనా అతని రికార్డుని బ్రేక్ చేయాలనుకున్నాడు హన్సెన్. అందుకోసం తన పెరట్లో పండించిన 386 కిలోల బరువున్న ఒక పెద్ద గుమ్మడికాయ పై భాగం తీసి పడవలా మార్చేశాడు.
లైఫ్ జాకెట్ వేసుకుని అందులో కూర్చొని ముస్సోరీ నదిలో 61 కిలోమీటర్ల దూరం ఒంటరిగా వెళ్లాడు. ‘‘పెద్ద అలలు వచ్చినప్పుడు ఆగిపోయేవాడిని. అలలు తగ్గాక మళ్లీ ముందుకు వెళ్లేవాడిని. పుట్టిన రోజునాడు అడ్వెంచర్ చేయడమే కాకుండా గిన్నిస్ రికార్డ్ సాధించినందుకు చాలా సంతోషంగా ఉంది” అన్నాడు హన్సన్. ఉదయం ఏడున్నరకు జర్నీ మొదలుపెట్టి సాయంత్రం ఆరున్నరకు పూర్తి చేశాడు. కొత్త రికార్డ్ క్రియేట్ చేసేందుకు హన్సెన్కు11 గంటల టైం పట్టింది.
