రామగుండం-మణుగూరు రైల్వే లైన్కు పచ్చజెండా..ఎంపీ వంశీకృష్ణ కృషితో పనుల్లో కదలిక

• 208 కిలోమీటర్ల సర్వే పూర్తి.. డీపీఆర్ రెడీ
• ప్రాజెక్ట్ అంచనా వ్యయం 
• రూ.3,998 కోట్లు
• పెద్దపల్లి ఎంపీ వంశీకృష్ణ కృషితో రైల్వే లైన్ పనుల్లో కదలిక
• నెరవేరబోతున్న కోల్​బెల్ట్ వాసుల పదిహేనేండ్ల కల

పెద్దపల్లి/గోదావరిఖని, వెలుగు: బొగ్గుతో పాటు ప్రజా రవాణాకు అనుకూలమైన రామగుండం–మణుగూరు​ కొత్త రైల్వే లైన్ నిర్మాణానికి కేంద్రం పచ్చజెండా ఊపింది. నత్తనడకన సాగుతున్న ఈ రైల్వేలైన్ నిర్మాణం కోసం పెద్దపల్లి ఎంపీ గడ్డం వంశీకృష్ణ కేంద్రంపై ఒత్తిడి తీసుకువస్తున్నారు. గతేడాది నవంబర్​లో జరిగిన పార్లమెంట్​ సమావేశాల్లో కూడా ఈ రైల్వే లైన్ నిర్మాణం చేపట్టాలని ప్రస్తావించారు. ఎంపీ విజ్ఞప్తిపై కేంద్ర రైల్వే శాఖ మంత్రి రవ్​నీత్ సింగ్ స్పందించారు. 207.80 కిలోమీటర్ల రామగుండం–మణుగూరు రైల్వే లైన్ నిర్మాణానికి సర్వే, డీపీఆర్ సిద్ధమైందని, ప్రాజెక్ట్​ నిర్మాణానికి అంచనా వ్యయం రూ.3,998 కోట్లుగా నిర్ణయించినట్టు ఎంపీకి లేఖ రాశారు.

ఎంపీగా వివేక్​ ఉన్నప్పుడే రైల్వేలైన్​ ప్రతిపాదన...

పెద్దపల్లి ఎంపీగా 2009లో జి.వివేక్ వెంకటస్వామి గెలిచినప్పటి నుంచి రామగుండం–మణుగూరురైల్వే లైన్ నిర్మాణం కోసం ప్రజల నుంచి డిమాండ్ మొదలైంది. దీంతో ఈ రైల్వే లైన్​ నిర్మించాలని​అప్పట్లో వివేక్ ప్రతిపాదించారు. ఎంపీగా వివేక్ కృషితో 2014లో ఈ రైల్వే లైన్ నిర్మాణం కోసం అవసరమైన సర్వేకు కేంద్ర ప్రభుత్వం రూ.10 కోట్లు కేటాయించింది. ఆ తర్వాత చాలా ఏండ్లుగా ఈ ప్రాజెక్ట్ నత్తనడక సాగుతున్నది.

సర్వే కోసం ఆఫీసర్లతో కమిటీ

రామగుండం–మణుగూరు రైల్వే లైన్ నిర్మాణం కోసం అవసరమైన సర్వే కోసం ప్రభుత్వం ఆఫీసర్లతో కమిటీ వేసింది. ఇందులో భాగంగా పెద్దపల్లి జిల్లాలోని మంథని, రామగిరి, కమాన్​పూర్ మండలాల పనులను జిల్లా అడిషనల్ కలెక్టర్, భూపాలపల్లి జిల్లాలోని మల్హర్, కాపురం మండలాల పనులతో పాటు మణుగూరు ప్రాంత పనులను భూపాలపల్లి సబ్ కలెక్టర్, ఘన్​పూర్, భూపాలపల్లి మండలాలకు సంబంధించిన సర్వే పనులను భూపాలపల్లి ఆర్డీవో పర్యవేక్షించి కేంద్ర రైల్వే శాఖకు అప్పగించారు.

కోల్ కారిడార్​గా.. కోల్​బెల్ట్ ప్రాంతం

రామగుండం–మణుగూరు కొత్త రైల్వే లైన్‌‌ పూర్తయితే రామగుండం, మణుగూరు, భూపాలపల్లి ఏరియాల నుంచి నిర్దేశించిన ప్రాంతాలకు బొగ్గు రవాణా సులువవుతుంది. ఈ ప్రాంతం కోల్‌‌కారిడార్‌‌గా అభివృద్ధి చెందుతుంది. వివిధ చిన్న, మధ్య తరహా పరిశ్రమలు నెలకొల్పేందుకు వీలు కలుగుతుంది. రామగుండం నుంచి రాఘవాపూర్ మీదుగా మణుగూరు వరకు సుమారుగా తొమ్మిది రైల్వే స్టేషన్లు ఏర్పాటు చేసే అవకాశం ఉంది.

మేడారం సమ్మక్క జాతరను టచ్ చేస్తూ...

బొగ్గు రవాణాతో పాటు ప్రయాణికుల రైళ్లు నడిపితే పెద్దపల్లి, భూపాలపల్లి, ములుగు జిల్లాల ప్రజలకు సౌకర్యవంతంగా ఉండనున్నది. మేడారం సమ్మక్క జాతరను టచ్​ చేస్తూ ఈ రైల్వే లైన్ వెళ్తుండడంతో జాతరకు వచ్చే భక్తులకు కూడా ఎంతో ఉపయోగకరంగా ఉంటుంది. రామగుండం నుంచి కొత్తగూడెం, మణుగూరు వెళ్లాలంటే గతంలో కాజీపేట రైల్వే జంక్షన్​కు చేరుకుని అక్కడి నుంచి మహబూబాబాద్ మీదుగా 349 కిలోమీటర్లు ప్రయాణించాల్సి వచ్చేది. కొత్తగా ఏర్పాటు చేసే ఈ రైల్వేలైన్‌‌207.80 కిలోమీటర్లే కావడంతో త్వరగా గమ్యం చేరుకునే వీలు కలుగుతుంది.

సింగరేణి ప్రాంత ప్రజలకు ఎంతో ఉపయోగం

తన పెద్దపల్లి పార్లమెంట్ పరిధిలో 15 ఏండ్లుగా పెండింగ్​లో ఉన్న రామగుండం–మణుగూరు రైల్వే లైన్ కొత్త మార్గాన్ని త్వరలో ప్రారంభించేందుకు రైల్వే శాఖ ముందుకు రావడం చారిత్రక పరిణామం. ఈ రైల్వే లైన్ సింగరేణి కార్మికులకు, సింగరేణి ప్రాంత ప్రజలకు, బొగ్గు రవాణాకు ఎంతో ఉపయోగపడటమే కాకుండా ప్రయాణ సౌకర్యాలు మెరుగుపడతాయి. దేశంలోనే అతిపెద్ద పండగ అయిన సమ్మక్క సారక్క జాతరకు వెళ్లే లక్షలాది మంది ప్రయాణికులకు ఈ రైల్వే లైన్ గొప్ప సౌకర్యంగా మారనున్నది. గత బీఆర్ఎస్ పదేండ్ల పాలనలో అభివృద్దికి దూరమైన పెద్దపల్లి పార్లమెంట్ నియోజకవర్గాన్ని అభివృద్ధి చేయాలనే లక్ష్యంలో భాగంగా ఎన్నికల్లో ఇచ్చిన హామీ మేరకు నేను ఈ ప్రాజెక్ట్‌‌పై దృష్టి పెట్టాను. గతేడాది నవంబర్​లో పార్లమెంట్ సమావేశాల్లో ఈ ప్రాజెక్ట్​ను వేగంగా పూర్తి చేయాలని కేంద్రం దృష్టికి తీసుకువచ్చి ఒత్తిడి తెచ్చాను. అలాగే పెద్దపల్లి–మంచిర్యాల ప్రాంతాల్లోని రైల్వే లైన్స్, రోడ్లు, ఎన్ హెచ్–​-63 అభివృద్ధి నా ప్రధాన ఎజెండా.
- గడ్డం వంశీకృష్ణ, పెద్దపల్లి ఎంపీ