- ఎమ్మెల్యే తోట లక్ష్మీకాంతారావు
పిట్లం, వెలుగు : పార్టీ కోసం కష్టపడి పని చేసే కార్యకర్తలకు సముచిత స్థానం దక్కుతుందని ఎమ్మెల్యే తోట లక్ష్మీకాంతారావు పేర్కొన్నారు. ఇటీవల కామారెడ్డి డీసీసీ ప్రెసిడెంట్గా నియమితులైన ఏటే మల్లికార్జున్కు కాంగ్రెస్ జుక్కల్ నియోజకవర్గ శ్రేణుల ఆధ్వర్యంలో పిట్లంలో సన్మాన కార్యక్రమం నిర్వహించారు. ఎమ్మెల్యేకు, డీసీసీ ప్రెసిడెంట్ కు స్వాగతం పలికారు. ఈ సందర్భంగా ఏర్పాటు చేసిన మీటింగ్లో ఎమ్మెల్యే మాట్లాడుతూ మల్లికార్జున్కు పదవి దక్కడం సామాన్య కార్యకర్తకు దక్కిన గౌరవమన్నారు.
నియోజకవర్గంతో పాటు, జిల్లాలో కాంగ్రెస్ పార్టీని మరింత బలోపేతం చేస్తామన్నారు. స్థానిక సంస్థల ఎన్నికల్లో మెజార్టీ స్థానాల్లో విజయం సాధించాలన్నారు. రాష్ర్ట ప్రభుత్వం చేపట్టిన సంక్షేమ పథకాలు, అభివృద్ధి పనులను ప్రజల్లోకి తీసుకెళ్లాలన్నారు. డీసీసీ ప్రెసిడెంట్ మల్లికార్జున్ మాట్లాడుతూ.. పార్టీ తనపై ఉంచిన నమ్మకాన్ని వమ్ము చేయకుండా పార్టీ బలోపేతానికి కృషి చేస్తానన్నారు. ఎమ్మెల్యే, డీసీసీ ప్రెసిడెంట్ ను సన్మానించారు. నియోజక వర్గంలోని నాయకులు, కార్యకర్తలు పాల్గొన్నారు.
