- 12 రాష్ట్రాల్లో 20 వేల మందిపై ‘ప్రశ్నమ్’ సంస్థ సర్వే
- 32.8% మంది మోడీకే జై ఆల్టర్నేటివ్గా రాహుల్కు 17.2% ఓట్లు
- కాంగ్రెస్, బీజేపీయేతర లీడర్లకు లేని ఆదరణ .. సీఎం కేసీఆర్కు 0.7 శాతమే
న్యూఢిల్లీ: దేశానికి నెక్స్ట్ ప్రైమ్ మినిస్టర్గా ఎవరు ఉండాలని కోరుకుంటున్నారు? అంటూ ‘ప్రశ్నమ్’ సంస్థ నిర్వహించిన సర్వేలో ప్రధాని మోడీకే జనం మళ్లీ జై కొట్టారు. దేశవ్యాప్తంగా12 రాష్ట్రాల్లో 20 వేల మంది ఓటర్లపై సర్వే నిర్వహించగా, మోడీ అందరికంటే పాపులర్ లీడర్ గా టాప్లో నిలిచారు. ఇటీవల ఎన్సీపీ చీఫ్ శరద్ పవార్తో పొలిటికల్ స్ట్రాటజిస్ట్ ప్రశాంత్ కిశోర్ భేటీలు, కాంగ్రెస్, బీజేపీ యేతర పార్టీల నేతలతోనూ చర్చల నేపథ్యంలో మళ్లీ థర్డ్ ఫ్రంట్ ఏర్పాటు కాబోతోందన్న ఊహాగానాలు జోరందుకున్నాయి. ఈ నేపథ్యంలో దేశానికి నెక్స్ట్ ప్రైమ్ మినిస్టర్గా ఎవరైతే బాగుంటుందంటూ ప్రశ్నమ్ సర్వే నిర్వహించింది. ఇందులో మోడీకి దరిదాపుల్లో ఏ లీడర్కూ స్థానం దక్కలేదు. మోడీకి 32.8% మంది జైకొట్టగా.. ఆయనకు ఆల్టర్నేటివ్గా కాంగ్రెస్ నేత రాహుల్ గాంధీకి 17.2% మంది ఓకే చెప్పారు. ఇతర ప్రాంతీయ పార్టీల లీడర్లెవరిపైనా పెద్దగా జనం మొగ్గు చూపలేదు. కాంగ్రెస్, బీజేపీయేతర పార్టీలు థర్డ్ ఫ్రంట్గా ఏర్పడినా మోడీకి దీటైన లీడరే లేరని ఈ సర్వేలో తేలింది.
ఎవరెవరికి ఎంత శాతం?
మోడీ, రాహుల్ తర్వాత ప్రధాని క్యాండిడేట్ గా బెంగాల్ సీఎం మమతా బెనర్జీకి 7% మంది సర్వేలో ఓటేశారు. యూపీ సీఎం యోగి ఆదిత్యనాథ్కు 6.1% మంది ఓకే చెప్పారు. తమిళనాడు సీఎం స్టాలిన్కు 3%, అఖిలేశ్ యాదవ్కు 2.2% ఓట్లు వచ్చాయి. మహారాష్ట్ర సీఎం ఉద్ధవ్ థాక్రేకు 2.1%, మధ్యప్రదేశ్ సీఎం శివరాజ్ సింగ్ చౌహాన్, రాజస్థాన్ సీఎం అశోక్ గెహ్లాట్కు 1.5%, కేరళ సీఎం పినరయి విజయన్, బిహార్ సీఎం నితీశ్ కుమార్కు 1.4% మంది మొగ్గుచూపారు. శరద్ పవార్, కేంద్ర మంత్రి అమిత్ షాకు 0.9%, కర్నాటక సీఎం యెడియూరప్పకు 0.8%, జార్ఖండ్ సీఎం హేమంత్ సోరెన్కు 0.5% ఓట్లు వచ్చాయి. నెక్స్ట్ పీఎం క్యాండిడేట్ గా సీఎం కేసీఆర్కు 0.7% మంది మాత్రమే మొగ్గు చూపినట్లు సర్వేలో వెల్లడైంది.
