- పాత అకౌంట్ ఉన్న బ్రాంచ్‌‌లోనే కొత్తగా 'కరెంట్ అకౌంట్' తీసుకోవచ్చు: ఎస్ఈసీ
హైదరాబాద్, వెలుగు: పంచాయతీ ఎన్నికల్లో పోటీ చేయబోయే అభ్యర్థులకు రాష్ట్ర ఎన్నికల సంఘం కాస్త ఊరటనిచ్చింది. ఎన్నికల ఖర్చుల కోసం ప్రత్యేకంగా బ్యాంక్ అకౌంట్ ఓపెన్ చేసే విషయంలో నిబంధనలను సవరిస్తూ శనివారం కీలక ఆదేశాలు జారీ చేసింది. సాధారణంగా నామినేషన్ వేయడానికి ఒక్కరోజు ముందే అభ్యర్థులు ఎన్నికల ఖర్చు కోసం ప్రత్యేకంగా కొత్త బ్యాంక్ ఖాతాను తెరవాల్సి ఉంటుంది. అయితే, ప్రస్తుతం నామినేషన్ల దాఖలు ప్రక్రియ పూర్తయింది.
కొత్తగా అకౌంట్ ఓపెన్ చేయడానికి బ్యాంకుల్లో ప్రాసెస్ ఆలస్యం అవుతుండటంతో అభ్యర్థులు ఇబ్బంది పడుతున్నట్టు ఎస్ఈసీ దృష్టికి వచ్చింది. దీంతో నిబంధనల్లో స్వల్ప మార్పులు చేస్తూ స్టేట్ఎలక్షన్ సెక్రటరీ మంద మకరందు సర్క్యులర్ జారీ చేశారు. ‘‘అభ్యర్థులు తమకు అప్పటికే ఖాతా ఉన్న బ్యాంక్ బ్రాంచ్‌‌లోనే ఎలక్షన్ ఖర్చు కోసం కొత్తగా ‘కరెంట్ అకౌంట్’ ఓపెన్ చేయొచ్చు. లేదా వేరే ఏదైనా బ్యాంకులోనైనా కొత్త అకౌంట్ తీసుకోవచ్చు”అని తెలిపారు. ఈ వెసులుబాటుతో అభ్యర్థులకు సమయం ఆదా అవ్వడంతో పాటు ఖాతా తెరిచే ప్రక్రియ వేగవంతం కానుంది
