ఏడేండ్ల కిందట ఫుడ్ ప్రాసెసింగ్కి సంబంధించిన ఓ వర్క్షాప్కి వెళ్లిందామె. ఆ ఇన్స్పిరేషన్తో సొంతంగా ఏదైనా వ్యాపారం పెట్టాలనుకుంది. ఆ ఆలోచనల్ని పేదరికం వెక్కిరించింది. నీ వల్ల కాని పనంటూ సవాలు చేసింది.అలాగని ఊరుకోలేదామె..చేతిలో ఉన్న ఐదొందలతోనే మొదలుపెట్టింది. ఇప్పుడు ‘షిరిన్’ పేరుతో 35 ఫుడ్ ప్రొడక్ట్స్ని మార్కెట్లోకి తీసుకొచ్చింది. రీసెంట్గా అస్సాం విమెన్ ఎంట్రప్రెనూర్ అవార్డు అందుకున్న ఈమె పేరు
యాంగ్మిలా జిమిక్.
మణిపూర్లోని ఫరూంగ్ అనే ఓ చిన్న కొండ ప్రాంతంలో పుట్టింది యాంగ్మిలా. మూడేండ్ల వయసులోనే తల్లి ప్రేమకి దూరమైంది. తండ్రి మరో పెండ్లి చేసుకున్నాడు. తనకి తోడు ఆరుగురు పిల్లలున్న వాళ్ల కుటుంబంలో మూడు పూటలా తినడమే పెద్ద విషయం. ఆ పరిస్థితుల వల్ల చదువుకి దూరమైందామె. చిన్న వయసులోనే పెండ్లి చేసుకుని పక్కనే ఉన్న ఉఖ్రుల్ జిల్లాకి వచ్చేసింది. కష్టాలు తీరతాయనుకుంటే.. కొడుకు పుట్టిన కొన్నేండ్లకే భర్త దూరమయ్యాడు. దాంతో కొడుకు బాధ్యతంతా ఆమె భుజాలపై పడింది. చిన్నా చితకా పనులు చేస్తూ కొడుకు ఆలనాపాలనా చూసుకుంది యాంగ్మిలా. ఏడేండ్ల కిందట ఒక వర్క్ షాపుకి వెళ్లడం ఆమె ఎంట్రప్రెనూర్ జర్నీకి బాట వేసింది.
ఉసిరి, చక్కెర కొని..
మణిపూర్కి చెందిన ఓ ఎన్జీవో ఫుడ్ ప్రాసెసింగ్కి సంబంధించి ఉఖ్రూన్లో ట్రైనింగ్ ప్రోగ్రాం ఏర్పాటు చేసింది. అందులో పాల్గొన్నాక.. వ్యాపారం చేయాలన్న ఆలోచన మొదలైంది. అయితే లక్షల్లో పెట్టుబడి పెట్టే స్థోమత లేకపోవడంతో.. తక్కువ ఇన్వెస్ట్మెంట్తో చేయగలిగే బిజినెస్ల గురించి ఆలోచించింది. అప్పుడొచ్చిందే క్యాండీ ఐడియా. మార్కెట్లో తాను సస్టైన్ అవ్వగలనో లేదో తెలుసుకోవడానికి శాంపిల్గా కొన్ని క్యాండీలు తయారుచేసి
ఫ్రెండ్స్ని, బంధువుల్ని
రుచి చూడమంది. అందరూ చెప్పిన మాట ఇంకొన్ని కావాలని. ఆ ఎంకరేజ్మెంట్తో తన దగ్గరున్న ఐదొందలతో... ఉసిరికాయలు, చక్కెర కొని మరికొన్ని క్యాండీలు తయారుచేసింది. వాటిని దగ్గర్లోని కిరాణా షాపులకి సప్లయ్ చేసింది. ఆశ్చర్యంగా రెండుమూడు రోజుల్లోనే తను పంపిన స్టాక్ అంతా సేల్ అయిపోయింది. ఇంకాస్త సరుకు పంపమని చాలా కిరాణా షాపుల నుంచి ఫోన్లు వచ్చాయి. దాంతో బిజినెస్ని మరింత సీరియస్గా తీసుకుంది.. జామ, ఆల్ బుఖార, ఆలివ్ పండ్లతో కూడా క్యాండీలు చేయడం మొదలుపెట్టింది. ఆ తర్వాత జామ్లని మార్కెట్లోకి తీసుకొచ్చింది. పికిల్ మేకింగ్ వర్క్ షాప్ ద్వారా పచ్చళ్ల తయారీ స్టార్ట్ చేసింది.
చేతులే మెషిన్
క్యాండీలు, జామ్లు, పచ్చళ్లతో పాటు కేక్, స్క్వాష్, వివిధ ఫ్లేవర్స్ గ్రీన్ టీలు..ఇలా మొత్తం కలుపుకొని 35 రకాల ప్రొడక్ట్స్ తయారుచేస్తోంది యాంగ్మిలా. అయితే వీటి తయారీకి ఎలాంటి మెషినరీ వాడదామె. ప్రత్యేకంగా తయారీ యూనిట్ కూడా లేదు. ఇంట్లోనే అది కూడా ఫ్రూట్స్తోనే ఈ ప్రొడక్ట్స్ అన్నీ తయారుచేస్తుంది. వాటిని చుట్టుపక్కలున్న యాభై స్టోర్స్లో అందుబాటులో ఉంచుతోంది. తన ఫేస్బుక్ పేజీలోనూ వీటిని అమ్ముతోంది. త్వరలో అమెజాన్, ఫ్లిప్కార్ట్ లాంటి ఆన్లైన్ స్టోర్స్లోనూ తన ప్రొడక్ట్స్ని తీసుకురానుంది. రీసెంట్గా ఒక జర్మన్ నాన్ ప్రాఫిట్ ఆర్గనైజేషన్ యాంగ్మిలా కంపెనీకి 12 లక్షల ఫండ్స్ ఇచ్చింది. అలాగే అస్సాం ప్రభుత్వం రూరల్ కేటగిరీలో విమెన్
ఎంట్రప్రెనూర్ అవార్డు ఇచ్చి సత్కరించింది.
