తల్లిదండ్రులు చేసే పనుల్ని చూసి పిల్లలు ఈజీగా నేర్చుకుంటారు. కొంతమంది పిల్లలైతే, పెద్దయ్యాక వాళ్ల అమ్మానాన్నలు చేసే పనే చేయాలనేంతలా ఇన్స్పైర్ అవుతుంటారు. ఈ పిలగాడు కూడా ఆ కోవకే చెందుతాడు. చిన్నప్పట్నించి వాళ్ల నాన్న చేసే పనిని ఇంట్రెస్ట్గా చూసేవాడు. అప్పుడప్పుడూ పనిలో సాయం చేసేవాడు. అలా ఆ పని నేర్చేసుకున్నాడు. ఇప్పుడు ఆ పనినే తన వ్యాపారంగా మార్చుకోవాలనుకుంటున్నాడు. చిన్న వయసులోనే పెద్ద ఆశయంతో ముందడుగు వేస్తున్నాడు.
గురంగ్ తయ వయసు పన్నెండేళ్లు. అరుణాచల్ ప్రదేశ్లో పుట్టిన గురంగ్ తయ ఏడో క్లాస్ చదువుతున్నాడు. వాళ్ల నాన్న గురంగ్ రాజేష్, ఎల్ఈడీ బల్బ్లు తయారుచేసి, ప్యాక్ చేసి మార్కెట్కు అమ్ముతాడు. గురంగ్ అప్పుడప్పుడూ వాళ్ల నాన్నకు సాయం చేస్తుంటాడు. అలా బల్బ్ తయారుచేసేందుకు కావాల్సిన వస్తువుల పేర్లు తెలుసుకున్నాడు. ఆ తరువాత వాటిని తయారుచేయడం మీద ఇంట్రెస్ట్ కలిగింది. దాంతో వాళ్ల నాన్నని అడిగి బల్బ్ తయారుచేయడం మొదలుపెట్టాడు. ఇప్పుడు తనే బల్బ్లు తయారుచేసి, ప్యాక్ కూడా చేస్తున్నాడు. ఎటువంటి కంగారు లేకుండా బొమ్మలతో ఆడుకున్నంత ఈజీగా వాటిని తయారు చేస్తున్నాడు. వీటి పేరు ‘కిమిన్ ఎల్ఈడీ బల్బ్’. వీటిని తయారుచేయడంలో పడి చదువు మానేయలేదు. స్కూల్కి వెళ్తూనే ఖాళీ టైంలో, సెలవుల్లో ఈ పని చేస్తున్నాడు. అంతేకాదు, ఫ్యూచర్లో ఎంట్రప్రెనూర్ అవ్వాలనుకుంటున్నాడు. తయ బల్బ్లను తయారుచేస్తుంటే.. తన ఫ్రెండ్ నియా కూడా నేర్చుకుంటున్నాడు. ఇదంతా నిజమా? అనే డౌట్వస్తే.. ఎల్ఈడీ బల్బ్ని గురుంగ్ తయారుచేసిన వీడియో వెతికి చూడొచ్చు.
