నిజామాబాద్, వెలుగు: జిల్లాలో ఫస్ట్ ఫేజ్ గ్రామ పంచాయతీ ఎన్నికలు జరిగే బోధన్ డివిజన్లో శుక్రవారం సర్పంచ్ స్థానాలకు 164 నామినేషన్లు దాఖలయ్యాయి. వార్డుల్లో పోటీ చేయడానికి 286 మంది నామినేషన్లు వేశారు. బోధన్ మండలంలో సర్పంచ్ అభ్యర్థులుగా 16, చందూర్లో 12, కోటగిరిలో 20, మోస్రాలో 01, పోతంగల్లో అత్యధికంగా 30, రెంజల్లో 24, రుద్రూర్ మండలంలో 11, సాలూరాలో 02, వర్నిలో 15, ఎడపల్లిలో 15, నవీపేట మండలంలో 18 నామినేషన్లు అందాయి.
ఎన్నికల నిర్వహణపై సమావేశం
జిల్లాలోని 545 పంచాయతీ సర్పంచ్, 5022 వార్డులకు జరిగే ఎలక్షన్ కోసం ఫస్ట్ ఫేజ్ ఎన్నికల నిర్వహణపై సమావేశం నిర్వహించారు. ఎన్నికలు జరిగే జీపీల్లో నాన్ లోకల్ పీవో, ఏపీవో, పోలింగ్ స్టాఫ్ను ఎంపిక చేశారు. కలెక్టర్ వినయ్కృష్ణారెడ్డి పర్యవేక్షణలో జరిగిన సమావేశంలో అదనపు కలెక్టర్ అంకిత్, డీపీవో శ్రీనివాస్రావు, నోడల్ ఆఫీసర్ పవన్కుమార్ ఉన్నారు. అంతకు ముందు రెవెన్యూ ఆఫీసర్లతో నిర్వహించిన వీడియో కాన్ఫరెన్స్లో భూభారతిలో వచ్చిన సాదాబైనామా అప్లికేషన్లు పరిష్కరించాలని కోరారు. చిన్న కారణాలతో దరఖాస్తులను తిరస్కరించవద్దని సూచించారు. ఆర్వోబీ, భారీ వర్షాలకు దెబ్బతిన్న రోడ్ పనులు త్వరగా పూర్తి చేయాలని ఆదేశించారు.
అమ్దాపూర్లో..
బోధన్ : బోధన్ మండలం అమ్దాపూర్లో శుక్రవారం కలెక్టర్ టి.వినయ్ కృష్ణారెడ్డి నామినేషన్ సెంటర్ ను పరిశీలించారు. నామినేషన్ కేంద్రానికి వచ్చేవారికి ఎలాంటి ఇబ్బందులు లేకుండా చూడాలన్నారు. సర్పంచ్, వార్డు మెంబర్ల అభ్యర్థులు నామినేషన్ ఫారాలను స్వీకరించేటప్పుడు ఎన్నికల నిబంధనలను పాటించాలని సూచించారు. సర్పంచ్, వార్డు సభ్యుల నుంచి నామినేషన్ పత్రాలతో పాటుగా కావాల్సిన ధ్రువీకరణ పత్రాలు ఉండేలా ఆర్వోలు, ఏఆర్వోలు అభ్యర్థులకు వివరించాలన్నారు. కలెక్టర్ వెంట బోధన్ ఎమ్మార్వో విఠల్, ఎంపీడీవో కిషోర్, ఎంపీవో మధుకర్ తదితరులు ఉన్నారు.
