అది రాజస్తాన్లోని ఓ పల్లెటూరు. ఓ రోజు పొద్దున్నే ఊరి జనాలంతా పార, పలుగు పట్టుకొని పొలంబాట పట్టారు. అంతలోనే వెనక నుంచి హారన్ సౌండ్.. అందరూ పక్కకు జరిగారు. వాళ్లందరి మధ్యలో నుంచి ఓ ట్రాక్టర్ వేగంగా దూసుకెళ్లింది. అంతే.. జనాలంతా ఒక్కసారిగా నోరెళ్లబెట్టారు. ఆ ట్రాక్టర్ వెనకాలే పరుగులు పెట్టారు. తీరా ఆ ట్రాక్టర్ ఓ పొలంలోకి వెళ్లి దున్నడం మొదలుపెట్టింది. అప్పటిదాకా ఆశ్చర్యంగా చూసిన వాళ్లంతా భయంతో పరుగులు తీశారు. ఎందుకంటే డ్రైవర్ లేకుండానే ఆ ట్రాక్టర్ పొలాన్ని దున్నేసింది.
డ్రైవర్ లెస్ కార్లు, బస్సులు తయారుచేయడానికి బడాబడా కంపెనీలే రకరకాల ప్రయోగాలు చేసి ఫెయిల్ అవుతుంటే… డిగ్రీ చదువుతున్న ఓ పల్లెటూరి కుర్రాడు ఏకంగా ఓ డ్రైవర్లెస్ ట్రాక్టర్నే తయారుచేశాడు. దాంతో పొలాన్ని దున్నుతూ, మిగతా వ్యవసాయ పనులన్నీ చేస్తూ ఔరా.. అనిపిస్తున్నాడు. అయితే అతనేమీ ఇంజనీరింగ్ చదవలేదు. టెక్నాలజీతో అసలు ఏమాత్రం సంబంధంలేని బీఎస్సీ సెకండియర్ చదువుతున్నప్పటికీ ఈ డ్రైవర్లెస్ ట్రాక్టర్ను తయారుచేసి ఎందరి నుంచో ప్రశంసలు అందుకుంటున్నాడు.
నాన్నకోసం..
రాజస్తాన్లోని బారన్ జిల్లా, బామొరి కలాన్ గ్రామానికి చెందిన యోగేశ్ నగార్.. ఇక్కడికి వంద కిలోమీటర్ల దూరంలో ఉన్న కోటాలో చదువుకుంటున్నాడు. ఓ రోజు ఇంటి నుంచి ఫోన్ వచ్చింది. నాన్నకు బాగాలేదని, వెంటనే రమ్మని అమ్మ ఫోన్ చేసింది. వెంటనే ఊరికి వెళ్లిన యోగేశ్కు నాన్న పరిస్థితి ఏంటో అర్థం కాలేదు. డాక్టర్ను అడిగితే.. ప్రమాదమేమీ లేదని, అయితే బరువైన పనులేవీ చేయకుండా చూడాలని సలహా ఇచ్చాడు. వ్యవసాయమే ఆధారమైన ఆ కుటుంబానికి పెద్దదిక్కు వాళ్ల నాన్నే. ఆయన వ్యవసాయం చేస్తేనే ఇల్లు గడిచేది.. యోగేశ్ చదువు సాగేది. పోనీ నాన్నకు రెస్ట్ తీసుకోమని చెప్పి, తాను వ్యవసాయం చేద్దామన్నా యోగేశ్కు ఏమాత్రం అవగాహన లేదు. పైగా తాను వ్యవసాయం చేయడానికి నాన్న కూడా ఒప్పుకోడు. నాన్న ఊరికే ఉండలేడు. దీంతో చేసే వ్యవసాయమేదో నాన్నకు కష్టం కాకుండా ఉండాలనే లక్ష్యంతోనే డ్రైవర్లెస్ ట్రాక్టర్ తయారు చేయాలి అనుకున్నాడు యోగేశ్.
కేవలం 2000 రూపాయలతో..
ఆరోగ్యం కాస్త కుదుటపడగానే మళ్లీ నాన్న ట్రాక్టర్ నడుపుతూ ఇబ్బంది పడడాన్ని యోగేశ్ చూడలేకపోయాడు. ట్రాక్టర్ కుదుపులు నాన్న ఆరోగ్యాన్ని మరింతగా దిగజారుస్తున్నాయని గుర్తించాడు. ఓ రోజు నాన్నను ఇంట్లోనే కూర్చోమని చెప్పి తాను ట్రాక్టర్ తీసుకొని పొలానికి బయల్దేరాడు. పొలం దున్నుతుంటే యోగేశ్కు ఓ ఆలోచన వచ్చింది. డ్రైవర్ లేకుండానే ఈ ట్రాక్టర్ పనిచేసేలా చేస్తే ఎలా ఉంటుంది? అని అనుకున్నాడు. డ్రైవర్లెస్ ట్రాక్టర్ తయారు చేస్తానని చెప్పడంతో ఫ్రెండ్స్ అంతా నవ్వుకున్నారు. అయినా అవేవీ పట్టించుకోకుండా ఇంట్లో నుంచి 2000 రూపాయలు తీసుకొని కోటాకు వెళ్లాడు. ట్రాక్టర్ రిమోట్ తయారుచేసేందుకు అవసరమైన అన్ని ఎలక్ట్రానిక్ గాడ్జెట్లను కొన్నాడు. ఒకవేళ తన ఐడియా సక్సెస్ కాకపోతే ఈ డబ్బంతా వృథా అవుతుందేమోనని భయపడ్డాడు. ఏదైతే అదవుతుందనుకొని ఇంటికి బయల్దేరాడు.
అప్పు తెచ్చి మరీ..
రోజంతా పొలం పనులు చూసుకొని, సాయంత్రం ఇంటికి వచ్చిన తర్వాత రిమోట్ తయారుచేసే పనులను ఒక్కొక్కటిగా పూర్తిచేసేవాడు. మొదట ట్రాక్టర్ను ముందుకు, వెనక్కి వెళ్లేలా చేయగలిగాడు. దీంతో యోగేశ్ టాలెంట్ మీద ఇంట్లోవాళ్లకు నమ్మకం కుదిరింది. మనిషి లేకుండా ఆపరేట్ చేయాలంటే కనీసం 50,000 రూపాయలు కావాలని నాన్నను అడిగాడు. దీంతో తనకు తెలిసినవాళ్ల దగ్గర నుంచి అప్పు తెచ్చి కొడుకును ప్రోత్సహించాడు యోగేశ్ నాన్న.
ఎన్నో మోడిఫికేషన్స్…
మామూలుగా ఓ బైక్కు కొత్త లుక్ తేవాలంటేనే ఎన్నో మోడిఫికేషన్స్ అవసరమవుతాయి. అలాంటిది ట్రాక్టర్ను డ్రైవర్లెస్గా మార్చాలంటే.. ? యోగేశ్ కూడా తాను తయారుచేయాలనుకున్న ట్రాక్టర్ కోసం ఎన్నో మోడిఫికేషన్స్ చేశాడు. దాదాపు ఆరునెలలపాటు నిద్రాహారాలు మాని పనిచేశాడు. ఎట్టకేలకు అనుకున్నది సాధించాడు.
ఊరోళ్లంతా నోరెళ్లబెట్టారు..
పూర్తిస్థాయిలో డ్రైవర్లెస్ ట్రాక్టర్ సిద్ధమయ్యాక.. నాన్నతో బైక్పై వెళ్తూ ట్రాక్టర్ను రిమోట్తో ఆపరేట్ చేశాడు యోగేశ్. దీంతో అసలు డ్రైవరే లేకుండా ట్రాక్టర్ వెళ్తుంటే చూసి ఊరోళ్లంతా నోరెళ్లబెట్టారు. అలా ఆ ట్రాక్టర్ను తన పొలంలోకి తీసుకెళ్లి.. గట్టుమీదే కూర్చుండి పొలమంతా దున్నేశాడు. ఇదంతా చూస్తున్న ఊళ్లోవాళ్లు అసలేం జరుగుతోందో అర్థం చేసుకోలేకపోయారు. స్టీరింగ్ దానంతట అదే తిరగడం, గేర్లు వాటంతటవే మారడం, కల్టివేటర్ అవసరమైనచోట భూమిలోకి దిగిపోవడం, అవసరం లేనిచోట పైకిరావడం..ఇదంతా చూసి కొందరైతే ఏదో శక్తి ట్రాక్టర్ను నడుపుతుందనుకొని అక్కడి నుంచి భయపడి వెళ్లిపోయారు. ఇదంతా కిలోమీటర్ దూరం నుంచి యోగేశ్ ట్రాక్టర్ను ఆపరేట్ చేస్తున్నాడని తెలుసుకొని నమ్మలేకపోయారు.
రోడ్డుపై అనుమతి లేదు..
డ్రైవర్లెస్ ట్రాక్టర్ను తయారుచేసినా దానిని ఉపయోగించేందుకు ముందు అధికారులు అనుమతి ఇవ్వలేదు. అయితే యోగేశ్ స్వయంగా అధికారులతో మాట్లాడి, తన తండ్రి పరిస్థితి వివరించడంతో అధికారులు అంగీకరించారు. అయితే రోడ్డుమీద మాత్రం డ్రైవర్ ఉండాల్సిందేనని చెప్పారు. పొలం పనులు చేసేటప్పుడు మాత్రమే రిమోట్ను ఉపయోగించాలని సూచించారు.
తండోపతండాలుగా..
యోగేశ్ తయారుచేసిన ట్రాక్టర్ను చూడ్డానికి రాజస్తాన్ నుంచే కాకుండా పక్కరాష్ట్రాల నుంచి కూడా వందలాది మంది రావడం మొదలైంది. పేపర్లలో, టీవీల్లో యోగేశ్ గురించి రకరకాల కథనాలు ప్రసారమయ్యాయి. దీంతో రాజస్తాన్లో యోగేశ్ ఇప్పుడు పెద్ద సెలబ్రిటీ.
సైన్యం కోసం ఓ వెహికిల్..
యోగేశ్ టాలెంట్ గురించి తెలుసుకున్న గుజరాత్లోని నేషనల్ ఇన్వెన్షన్ ఫౌండేషన్ అధికారులు స్వయంగా రాజస్తాన్ వచ్చి ట్రాక్టర్ను పరిశీలించారు. తాము సైన్యం కోసం ఇలాంటిదే ఓ వెహికిల్ను తయారు చేస్తున్నామని, ఆ ప్రాజెక్టుకు సహకరించాలని కోరారు. దీంతో యోగేశ్ కూడా సంతోషంగా అంగీకరించాడు.
యాంటీ థెఫ్ట్ అలారమ్..
డ్రైవర్లెస్ ట్రాక్టర్తో ఫేమస్ అయినప్పటికీ ఇలాంటివి ఎన్నో తయారుచేశాడట యోగేశ్. ఇంటికి తాళం వేసి ఎక్కడికైనా బయటకు వెళ్లినప్పుడు.. ఆ తాళాన్ని ఎవరైనా తాకినా, పగలగొట్టే ప్రయత్నం చేసినా వెంటనే ఇంటి యజమానికి ఎస్సెమ్మెస్ వెళ్లేలా ‘యాంటీ థెఫ్ట్ అలారమ్’ను కూడా యోగేశ్ తయారుచేశాడు.
నాన్న హ్యాపీ..
తన కొడుకు గురించి తండ్రి రాంబాబు మాట్లాడుతూ.. ‘‘యోగేశ్ మీద చిన్నప్పటి నుంచి నాకు నమ్మకం ఎక్కువ. ఏదైనా చేయాలనుకుంటే దానికోసం ఎంతో కష్టపడతాడు. నా ఆరోగ్యం బాగాలేదని తెలిసిన వెంటనే చదువు మానేసి ఇంటికొచ్చేశాడు. దానికి నేను ఎంతో బాధపడ్డా. అయితే ఈరోజు యోగేశ్ సాధించిన ఘనతను చూసి గర్వపడుతున్నా. కొత్త కొత్త విషయాలు కనిపెట్టాలంటే పెద్దపెద్ద చదువులే అక్కర్లేదు. కొన్నిసార్లు మన అవసరం కూడా ఆవిష్కరణలకు కారణమవుతుంది. నా కొడుకు విషయంలో కూడా అదే జరిగింది. నాన్న కష్టపడకూడదన్న ఆలోచనే యోగేశ్తో ఈ ట్రాక్టర్ తయారుచేయించింది. ఇప్పుడు సైన్యం కోసం ఓ వెహికిల్ తయారుచేసే పనిలో ఉన్నాడు. ఇది నాకు మరింత గర్వంగా ఉంది. నా కొడుకును ప్రోత్సహిస్తే మరెన్నో అద్భుతాలు సాధిస్తాడ’ని చెప్పాడు.