- జాబ్ సెక్యూరిటీ, ప్రమోషన్ల ఆశతో భారీగా దరఖాస్తులు
హైదరాబాద్, వెలుగు: రాష్ట్రంలో టీచర్ ఎలిజిబిలిటీ టెస్ట్ ( టీజీ టెట్) రాసేందుకు సర్కారు బడుల్లో పనిచేసే టీచర్లు భారీగా అప్లై చేసుకున్నారు. జాబ్ సెక్యూరిటీ, భవిష్యత్తులో వచ్చే ప్రమోషన్ల కోసమో, అర్హతలను పెంచుకునేందుకో గానీ ఏకంగా 70,851 మంది ఇన్-సర్వీస్ టీచర్లు అప్లై చేశారు. శుక్రవారం అర్ధరాత్రితో దరఖాస్తు గడువు ముగియగా.. సాయంత్రం 6 గంటల వరకు రాష్ట్రవ్యాప్తంగా మొత్తం 2,26,956 అప్లికేషన్లు వచ్చాయని పాఠశాల విద్యాశాఖ డైరెక్టర్ నవీన్ నికోలస్ వెల్లడించారు. దీంట్లో పేపర్-1కి 81,921 దరఖాస్తులు రాగా.. పేపర్-2కు అత్యధికంగా 1,45,035 అప్లికేషన్లు వచ్చాయి.
డిసెంబర్ 1 వరకు ఎడిట్ ఆప్షన్..
దరఖాస్తుల్లో పొరపాట్లుంటే సరిచేసుకునేందుకు విద్యాశాఖ చాన్స్ ఇచ్చింది. అభ్యర్థులు డిసెంబర్ 1వ తేదీ వరకు https://schooledu.telangana.gov.in వెబ్‌సైట్‌లో ఎడిట్ చేసుకోవచ్చు. సందేహాల కోసం పనివేళల్లో 7093708883, 7093708884
నంబర్లను సంప్రదించవచ్చని అధికారులు తెలిపారు.
