కాగజ్ నగర్/ఆసిఫాబాద్/జన్నారం,వెలుగు : ఎలక్షన్ కోడ్ అమల్లోకి వచ్చిన నేపథ్యంలో పోలీసులు ముమ్మర తనిఖీలు చేపడుతున్నారు. తనిఖీల్లో సోమవారం దాదాపు రూ.8 లక్షలు పట్టుబడ్డాయి. సిర్పూర్ టీ మండలంలోని హడ్కులి అంతరాష్ట్ర చెక్పోస్ట్ వద్ద రూ.5 లక్షలు నగదు పట్టుకుని సీజ్ చేసినట్లు సిర్పూర్ టీ ఎస్ఐ దీకొండ రమేశ్ తెలిపారు. మహారాష్ట్ర వైపు తీసుకెళ్తుండగా పట్టుకున్నట్లు చెప్పారు.
వాంకిడి టోల్ ప్లాజా వద్ద తనిఖీ చేస్తుండగా ఓ వ్యక్తి బైక్పై తరలిస్తున్న రూ.లక్షా 11 వేలు, మరో బైకర్ వద్ద రూ.78 వేల 400 పట్టుకున్నట్లు చెప్పారు. సీజ్ చేసిన నగదును జిల్లా కమిటీకి అప్పగిస్తామన్నారు. జన్నారం మండలం ఇందన్ పెల్లిలోని అంతర్ జిల్లా చెక్ పోస్టు వద్ద రూ.లక్షా 5 వేల 900 నగదు పట్టుకున్నట్లు లక్సెట్టిపేట సీఐ నరేందర్ తెలిపారు. ఓ ఐషర్ వ్యాన్లో లభించినట్లు చెప్పారు.
