బ్యూటిఫుల్ ఊరు గురించి చెప్పమని ఎవరైనా అడిగితే... చారిత్రక కట్టడాలు, జలపాతాలు, గుహలు, వెరైటీ లైఫ్ స్టైల్ వంటివి ఉన్న ఊళ్లు గుర్తొస్తాయి. కానీ... ఈ ఊరి గురించి చెప్పాలంటే మాత్రం ముందు ఊళ్లో ఉన్న కిటికీల గురించి చెప్పాలి. ఎందుకంటే అక్కడున్న ఇళ్లు, దేవాలయాలు, స్కూల్స్, కాలేజీలు ఏవైనా... వాటికి ఉండే కిటికీలే స్పెషల్ అట్రాక్షన్. ఒక్క మాటలో చెప్పాలంటే కిటికీలే ఆ ఊరికి అందం. కంప్యూటర్కి విండోస్ ఎంత ఇంపార్టెంటో... ఈ ఊళ్లో విండోస్ కూడా అంతే స్పెషల్!
బెరాత్... అల్బేనియా దేశంలో ఉన్న ఒక చిన్న ఊరు. దీన్ని ‘ది సిటీ ఆఫ్ ఎ థౌజండ్ విండోస్’ అంటారు. అంటే వేయి కిటికీలు ఉన్న సిటీ అన్నమాట. దీనికి ఆ పేరెలా వచ్చిందంటే... ఇక్కడి బిల్డింగ్లన్నీ వైట్ పెయింట్ వేసిన గోడలతో, పైకప్పు సెరామిక్ టైల్స్తో కనిపిస్తాయి. దూరం నుంచి చూస్తే బిల్డింగ్లన్నీ ఒకదాని మీద ఒకటి అగ్గిపెట్టెలు పేర్చినట్లు ఉంటాయి. వాటిని చూస్తుంటే ఊరంతా కిటికీలే ఉన్నాయా! అనిపిస్తుంది. అల్బేనియాలో ఉన్న తొమ్మిది పాపులర్ ఊర్లల్లో ఇదొకటి. ఆ దేశానికి దక్షిణం వైపు ఉన్న బెరాత్ ఊరి చుట్టూ పర్వతాలు, కొండలు ఉంటాయి. వాటితో పాటు తోమోర్ అనే మౌంటెన్ రేంజ్ ఉంది. దాన్ని తోమోర్ నేషనల్ పార్క్గా ప్రకటించారు. ఈ ఊరి నుంచి ‘ఓసం’ అనే నది కూడా పారుతుంటుంది. అంతేకాదు, ఇక్కడ ఆర్కిటెక్చర్ చూస్తే ఎన్నో నాగరికతలు కళ్ల ముందు నిలుస్తాయి. ఎందుకంటే పూర్వం అక్కడ రకరకాల జాతుల ప్రజలు నివసించారు. అది మనకు వాళ్ల ప్రత్యేకమైన ఆర్కిటెక్చర్ స్టైల్లో కనిపిస్తుంది. బెరాత్లో చర్చ్లు, మసీదులు, ఇతర కట్టడాల మీద కూడా మ్యూరల్స్, ఫ్రెసో పెయింటింగ్స్ అందంగా వేసి ఉంటాయి.
ట్రేడర్లు తక్కువే
18వ శతాబ్దంలో బెరాత్ సొసైటీలో ఉన్న రకరకాల వృత్తుల వాళ్లు ట్యాక్స్ భారాన్ని తగ్గించుకోవడం కోసం సిటీ ట్రేడర్స్తో కలిసిపోయారు.1750 నాటికి బెరాత్ సొసైటీలో 22 మంది మాత్రమే ట్రేడర్లున్నారు. వాళ్లలో ఎక్కువగా తోళ్ళ వ్యాపారం చేసేవాళ్లు. మిగతా వాళ్లంతా మెటల్ వర్క్, సిల్క్ తయారుచేసే పనులుచేసేవారు. కానీ ఇప్పుడు బెరాత్ అందుకు పూర్తి డిఫరెంట్గా ఉంటుంది. ఆ ప్రాంతాల్లో అల్బేనియా ఆ మిలిటరీ ఇండస్ట్రీ, దానికి దగ్గర్లో ఫ్యాక్టరీలు వెలిశాయి. అయితే వీటన్నిటితోపాటు ఇక్కడున్న హిస్టారికల్ సైట్స్ వల్ల టూరిజం డెవలప్ అయింది.
టూరిస్ట్ అట్రాక్షన్స్
బెరాత్లో కిటికీలే కాదు... చూడాల్సిన ప్లేస్లు చాలా ఉన్నాయి. చారిత్రక ప్రదేశాలు, కట్టడాలు, మ్యూజియాలు, థియేటర్స్, చర్చ్లు, మసీదులు, బౌద్ధారామాలు (మోనస్ట్రీలు), ఇతర ప్రదేశాలు చూడదగ్గవి. ఇన్ని విశేషాలు ఉన్నాయి కాబట్టే బెరాత్ని 2008 లో ‘‘వరల్డ్ హెరిటేజ్ సైట్’’గా యునెస్కో ప్రకటించింది.
చర్చ్ల్లో హోలీ ట్రినిటీ, సెయింట్ మేరీ ఆఫ్ బ్లచర్నే, సెయింట్ థియోడోర్, సెయింట్ మైఖేల్, డోర్మిషన్ ఆఫ్ సెయింట్ మేరీ కేథడ్రల్ ఫేమస్. అవన్నీ రాళ్లతో కట్టినవే. బయట, లోపల ఆర్కిటెక్చర్ ఎంతో అందంగా అట్రాక్ట్ చేస్తుంది. ఇక్కడ మసీదుల సంఖ్య కూడా ఎక్కువే. ఆ మసీదులకు రెండు పేర్లుంటాయి. సిలెజ్మాన్ పాషా మసీదు. కేవలం బ్యాచిలర్స్కి మాత్రమే. అలాగే కింగ్ మసీద్ను సుల్తాన్స్ లేదాసుల్తాన్ బయెజిద్ అని, లీడ్ మసీద్ను ఇజ్గుర్లి అని పిలుస్తారు. వీటితోపాటు ఓసం నది మీద గోరిక బ్రిడ్జ్ కూడా చూడొచ్చు.
బెరాత్లో నేషనల్ ఎత్నోగ్రాఫిక్ మ్యూజియం కూడా ఉంది. ఈ మ్యూజియంలో ఫర్నిచర్, ఇంట్లో వాడుకునే వస్తువులు, చెక్క పెట్టెలు, చిన్న బావి, చిమ్నీల వంటివి ఉన్నాయి. ఆ బావి దగ్గర ఆలివ్ ఆయిల్ తీసే గానుగ వంటివి చూడొచ్చు. గ్రౌండ్ ఫ్లోర్లో హాల్, ట్రెడిషనల్ షాప్లు ఉంటాయి. రెండో ఫ్లోర్లో విలేజ్ సిట్టింగ్ రూం, కిచెన్ ఉన్నాయి.
ఒక్కో భాషలో ఒక్కోలా...
బెరాత్ అనే పదం ఓల్డ్ స్లావొనిక్ భాషలో ‘బెల్ గ్రాడ్’ లేదా ‘బెలిగ్రాడ్’ అని పిలిచేవారు. అంటే ‘వైట్ సిటీ’ అని దానర్థం. లాటిన్లో బెలో గ్రాడమ్, బెల్లెగ్రాడమ్, ఇటాలియన్లో బెల్ గ్రాడో, గ్రీక్లో బెల్లెగ్రాడా, బెల్ గ్రాడ్ – ఐ అర్నవుడ్ (అల్బేనియన్ బెల్ గ్రేడ్) అని పిలుస్తారు.
