- ముంబయి నుంచిహైదరాబాద్కు సప్లయ్
- యువతితో పాటు మరో నలుగురిని అదుపులోకి తీసుకున్న పోలీసులు
- 8 గ్రాముల ఎండీఎంఏ స్వాధీనం
హైదరాబాద్, వెలుగు : ముంబయి నుంచి డ్రగ్స్ తీసుకొచ్చి సిటీలో అమ్మేందుకు యత్నించిన యువతితో పాటు మరో నలుగురిని చాదర్ఘాట్, సౌత్ ఈస్ట్ జోన్ టాస్క్ ఫోర్స్ పోలీసులు అరెస్ట్ చేశారు. మలక్పేట ఏసీపీ శ్యామ్ సుందర్ తెలిపిన వివరాల ప్రకారం.. సంతోష్నగర్కు చెందిన అయేషా ఫిర్దోస్(21) యాదగిరి థియేటర్ సమీపంలో ఉంటోంది. ఓల్డ్ సిటీలో ఎండీఎంఏ డ్రగ్కు డిమాండ్ ఉండటంతో ఆమె సప్లయర్గా మారింది. న్యూ ఇయర్ వేడుకల్లో అమ్మేందుకు ఎండీఎంఏ డ్రగ్ను ముంబయిలో కొని సిటీకి తీసుకొచ్చింది.
సోమవారం ఉదయం చాదర్ ఘాట్కు చెందిన కస్టమర్లు కైజారుద్దీన్ అనస్ (21), సైదాబాద్ కాలనీకి చెందిన మహ్మద్ అఫన్(21), అయాజ్ ఖాన్(21), షాబాజ్ షరీఫ్(21)కు అమ్మేందుకు యత్నించింది. అప్పటికే వీరిపై నిఘా పెట్టిన చాదర్ ఘాట్, సౌత్ ఈస్ట్ జోన్ టాస్క్ ఫోర్స్ పోలీసులు మలక్ పేటలోని నల్గొండ క్రాస్ రోడ్స్ వద్ద అయేషాతో పాటు నలుగురు కస్టమర్లను అదుపులోకి తీసుకున్నారు. 8 గ్రాముల ఎండీఎంఏను స్వాధీనం చేసుకున్నారు.
