న్యూఢిల్లీ: భారత్, పాక్ ఉద్రిక్తతల కారణంగా ఒక 15 రోజుల పాటు నిలిచిపోవడం తప్పితే మిగిలిన ఐపీఎల్ 18వ సీజన్ విజయవంతంగా ముగిసింది. క్రికెట్ ప్రియులను దాదాపు రెండున్నర నెలల పాటు ఉర్రూతలూగించిన ఈ సీజన్లో ఐపీఎల్లోనే అత్యధిక ఫ్యాన్ ఫాలోయింగ్ ఉన్న ఆర్సీబీ జట్టు ఈ ఏడాది విజేతగా నిలిచింది. గుజరాత్లోని అహ్మదాబాద్ స్టేడియం వేదికగా జరిగిన ఫైనల్ పోరులో పంజాబ్ను చిత్తు చేసి ఆర్సీబీ తొలి ఐపీఎల్ టైటిల్ కైవసం చేసుకుంది. తద్వారా ఐపీఎల్ టైటిల్ గెలవాలన్న 18 ఏళ్ల నిరీక్షణకు ఆర్సీబీ తెరదించింది.
ఇదిలా ఉంటే.. ఈ సీజన్లో స్టార్ ప్లేయర్లతో పాటు చాలా మంది యంగ్స్టర్స్, అన్ క్యాప్డ్ ఆటగాళ్లు అద్భుతంగా రాణించారు. చిన్న వయసులోనే సీనియర్లకు ధీటుగా పరుగుల చేసి తమ సత్తా ఏంటో ప్రపంచానికి చూపించారు. ఏజ్ జస్ట్ ఏ నెంబర్ అని నిరూపించారు. ఇలా చాలా మంది యువ ఆటగాళ్లు ఈ సీజన్లో వెలుగు లోకి వచ్చారు. ఈ నేపథ్యంలో ఐపీఎల్ 18వ సీజన్లో అద్భుత ప్రదర్శన చేసిన ఆన్ క్యాప్డ్ ప్లేయింగ్ లెవన్ జట్టును కామెంటేటర్ ఆకాష్ చోప్రా ప్రకటించాడు.
ఈ సీజన్లో ఆకట్టుకున్న యువ ఆటగాళ్ల తన ప్లేయింగ్ లెవన్ జట్టులో స్థానం కల్పించాడు. అయితే.. ఆకాష్ చోప్రా ప్లేయింగ్ లెవన్లో ఈ సీజన్లో అత్యధిక పరుగులు చేసి ఆరెంజ్ క్యాప్ విన్నర్గా నిల్చిన గుజరాత్ టైటాన్స్ బ్యాటర్ సాయి సుదర్శన్ పేరు లేకపోవడం షాకింగ్కి గురి చేసింది. అంతేకాకుండా సీజన్ మధ్యలో చెన్నై జట్టులో చేరి అదరగొట్టిన యంగ్ ప్లేయర్ ఆయుష్ మాత్రేకు కూడా తన ప్లేయింగ్ లెవన్లో చోటు కల్పించలేదు ఆకాష్ చోప్రా.
ఈ ఇద్దరు యువ ప్లేయర్లను చోప్రా తన ప్లేయింగ్ లెవన్లో ఎంపిక చేయకపోవడం గమనార్హం. కేవలం 35 బంతుల్లోనే శతకం బాది సంచలనం సృష్టించిన 14 ఏళ్ల చిచ్చర పిడుగు వైభవ్ సూర్య వంశీ ఆకాష్ చోప్రా ఆన్ క్యాప్డ్ ప్లేయింగ్ లెవన్లో చోటు దక్కించుకున్నాడు. తన జట్టులో వైభవ్ను ఫస్ట్ డౌన్ బ్యాటర్గా చోప్రా ఎంపిక చేశాడు. ఈ సీజన్లో పంజాబ్ ఫైనల్ చేరడంలో కీ రోల్ ప్లే చేసిన ఆ జట్టు యువ ఓపెనర్స్ ప్రభుస్రిమాన్ సింగ్, ప్రియాంశ్ ఆర్య ఇద్దరిని తన టీములో సెలెక్ట్ చేశాడు చోప్రా. ఈ ఏడాది రన్నరప్ గా నిల్చిన పంజాబ్ జట్టు నుంచే ఏకంగా ఆరుగురిని సెలెక్ట్ చేశాడు. విజేతగా నిలిచిన ఆర్సీబీ నుంచి కేవలం బౌలర్ యశ్ దయాల్కు మాత్రమే తన జట్టులో స్థానం కల్పించాడు.
ఆకాశ్ చోప్రా అన్‌క్యాప్డ్ IPL ప్లేయింగ్ XI:
ప్రభ్‌సిమ్రాన్ సింగ్, ప్రియాంష్ ఆర్య, వైభవ్ సూర్యవంశీ, నెహాల్ వధేరా, శశాంక్ సింగ్, నమన్ ధీర్, విప్రజ్ నిగమ్, హర్‌ప్రీత్ బ్రార్, యశ్ దయాల్, విజయ్‌కుమార్ వైషక్, అన్షుల్ కాంబోజ్
