పాలమూరు, వెలుగు: మహబూబ్నగర్ లోని మున్సిపల్ ఆఫీసు ఏఈ పృథ్వీ మున్సిపల్ కాంట్రాక్టర్ నుంచి రూ.50 వేలు లంచం తీసుకుంటూ ఏసీబీకి చిక్కాడు. ఏసీబీ డీఎస్పీ కృష్ణ గౌడ్ కథనం ప్రకారం...మహబూబ్గర్ కు చెందిన మున్సిపల్ కాంట్రాక్టర్ పిట్ల యాదయ్య 2014 నుంచి మున్సిపాలిటీలో కాంట్రాక్టర్ గా పని చేస్తున్నాడు. రోడ్డు పనులు, శతాబ్ది ఉత్సవాల్లో భాగంగా కరెంట్లైట్ల కాంట్రాక్టును రూ.11 లక్షలకు తీసుకొని పనులు చేశాడు. బిల్లులు పాస్ చేయాలని మున్సిపల్ ఏఈ పృథ్వీని అడగ్గా రూ.70 వేల లంచం డిమాండ్ చేశాడు.
అయితే, రూ.50 వేలు ఇస్తానని నమ్మించిన యాదయ్య ఈ నెల 7న ఏసీబీ అధికారులను ఆశ్రయించాడు. వారి సూచనల మేరకు శనివారం జిల్లా కేంద్రంలోని మెట్టుగడ్డ చౌరస్తాలో పృథ్వీకి డబ్బులు ఇస్తుండగా ఏసీబీ రైడ్ చేసి పట్టుకుంది. ఏఈని కోర్టులో హాజరు పర్చనున్నట్లు డీఎస్పీ తెలిపారు. ఎవరైనా లంచం అడిగితే ఏసీబీ ట్రోల్ ఫ్రీ నెంబర్ 10 64కు లేదంటే మహబూబ్నగర్ ఏసీబీ ఆఫీసులో ఫిర్యాదు చేయవచ్చన్నారు.
