చెన్నూర్, వెలుగు: మంచిర్యాల జిల్లా కోటపల్లి మండలం శెట్పల్లిలో దళిత రైతు దుర్గం బాపు(40)ను కొయ్యకు కట్టేసిన ఘటనలో అదే గ్రామానికి చెందిన సూరం రాంరెడ్డి(50) పై ఎస్సీ, ఎస్టీ అట్రాసిటీ కేసు నమోదు చేసిన పోలీసులు.. శుక్రవారం అరెస్టు చేసి రిమాండ్కు తరలించారు. గురువారం మధ్యాహ్నం దుర్గం బాపు ఎడ్లు తన పొలంలో పడ్డాయని వాటిని రాంరెడ్డి తన ఇంటి దగ్గర కట్టేసుకున్నాడు.
రాంరెడ్డి లేని టైమ్లో బాపు వెళ్లి ఎడ్లను విడిపించుకొచ్చాడు. దీంతో రాంరెడ్డి సాయంత్రం బాపును ఈడ్చుకొచ్చి తన ఇంటి ముందు కొయ్యకు కట్టేసి కొట్టాడు. గ్రామస్తులు జోక్యం చేసుకొని బాపును విడిపించారు. బాధితుడు వెంటనే కోటపల్లి పోలీస్స్టేషన్లో కంప్లయింట్ చేశాడు. దీంతో రాంరెడ్డిపై పోలీసులు ఎస్సీ, ఎస్టీ అట్రాసిటీ కేసు నమోదు చేశారు. రామగుండం పోలీస్ కమిషనర్ రెమా రాజేశ్వరి ఆదేశాలతో శుక్రవారం జైపూర్ఏసీపీ మోహన్ శెట్పల్లికి వెళ్లి ఎంక్వయిరీ చేశారు. ప్రత్యక్ష సాక్షులను విచారించారు. రాంరెడ్డిని అరెస్టు చేసి జ్యుడీషియల్ రిమాండ్కు తరలించారు.