సినీ నటుడు సుశాంత్ కేవలం నటుడిగానే కాకుండా, క్రీడా రంగంలోనూ అడుగుపెట్టారు. హైదరాబాద్‌లో తొలిసారిగా ప్రారంభమవుతున్న ప్రతిష్టాత్మక హైదరాబాద్ పికిల్‌బాల్ లీగ్ (HPL)లో టీమ్ యజమానిగా చేరారు. ఈ లీగ్‌లోని ఎనిమిది జట్లలో ఒకటైన 'ఆల్ స్టార్స్' టీమ్‌ను సుశాంత్ కొనుగోలు చేశారు. క్రీడల పట్ల తనకున్న మక్కువను, ఆసక్తిని తెలియజేస్తూ సోషల్ మీడియాలో పోస్ట్ చేశారు. ఈ కొత్త హెచ్పీఎల్ లో భాగమైనందుకు చాలా సంతోషంగా ఉందని సుశాంత్ తెలిపారు.
'ఆల్ స్టార్స్' టీమ్‌కు సారథిగా స్టార్ ప్లేయర్
'ఆల్ స్టార్స్' జట్టుకు నాయకత్వం వహించేందుకు భారత అగ్రశ్రేణి పికిల్‌బాల్ క్రీడాకారుల్లో ఒకరైన సమీర్ వర్మను ఐకాన్ ప్లేయర్‌గా, కెప్టెన్‌గా నియమించారు. ఆగస్టు 20న జరిగే లైవ్ ఆక్షన్ ద్వారా జట్టులోని మిగిలిన ఆటగాళ్లను ఎంపిక చేయనున్నారు. పికిల్‌బాల్ క్రీడలో సమీర్ వర్మ ప్రతిభ అసాధారణమైనది. అతని అనుభవం, నైపుణ్యం 'ఆల్ స్టార్స్' జట్టుకు గొప్ప బలాన్ని ఇస్తాయి.
ఎప్పుడు ప్రారంభం?
ఈ లీగ్ మ్యాచ్‌లు అక్టోబర్ 11వ తేదీ నుంచి నవంబర్ 28వ తేదీ వరకు ప్రతి శుక్రవారం జరగనున్నాయి. ఈ లీగ్‌లో ఎనిమిది జట్లు రౌండ్-రాబిన్ ఫార్మాట్‌లో తలపడతాయి. సుశాంత్ ఈ కొత్త ప్రయాణంలో తన జట్టుకు మద్దతు ఇవ్వాలని అభిమానులను కోరారు. హైదరాబాద్‌ను సినిమా రంగానికి మాత్రమే కాకుండా, క్రీడా రంగానికి కూడా కేంద్రంగా మార్చడంలో ఈ లీగ్ ఒక కొత్త అధ్యాయానికి నాంది పలుకుతుందని అభిమానులు భావిస్తున్నారు. సుశాంత్ ఈ చారిత్రాత్మక లీగ్‌లో భాగం కావడం పట్ల హర్షం వ్యక్తం చేస్తూ, హైదరాబాద్ పికిల్‌బాల్ లీగ్, సెంటర్ కోర్ట్, ఈ ప్రాజెక్ట్‌లో భాగమైన ప్రతి ఒక్కరికీ ధన్యవాదాలు తెలిపారు.
Need all your support on this new journey :) Go ALL STARS! 🌟#HyderabadPickleballLeague pic.twitter.com/zi4SxTE4il
— Sushanth A (@iamSushanthA) August 19, 2025
