- తెలిసీ తెలియని వయసులో యూపీ నుంచి తెలంగాణకు..
- బేకరీ యజమాని చొరవతో పేరెంట్స్ దగ్గరకు..
- మంచిర్యాల జిల్లా బెల్లంపల్లిలో ఘటన
బెల్లంపల్లి, వెలుగు: తెలిసీ తెలియని వయస్సులో పని కోసం ముంబైకి వెళ్లి, ఆ తర్వాత ఓ బేకరీలో పని చేసిన యువకుడు 16 ఏండ్ల తర్వాత తన తల్లిదండ్రులను కలుసుకున్నాడు. ఈ అరుదైన ఘటన మంచిర్యాల జిల్లా బెల్లంపల్లిలో చోటు చేసుకుంది. ఉత్తర్ ప్రదేశ్ రాష్ట్రంలోని ఘజియాపూర్ జిల్లా మహ్మదాబాద్ తహసీల్ యూసుఫ్పూర్ గ్రామానికి చెందిన మున్నా కుమార్ బింద్, సంత్రా దేవి దంపతులకు నలుగురు కొడుకులు, ఓ కూతురు ఉన్నారు. పెద్ద కొడుకు మహేందర్ కుమార్ తెలిసీ తెలియని వయసులో పని కోసం తన బంధువుతో కలిసి ముంబై వెళ్లాడు. అక్కడ ఓ టీ స్టాల్ లో పనిచేస్తున్న సమయంలో ఉత్తరప్రదేశ్కే చెందిన శివ కుమార్ యాదవ్ తో పరిచయం ఏర్పడింది. కొంత కాలం తర్వాత వీరిద్దరూ కలిసి పని కోసం బెల్లంపల్లికి వచ్చి మనీషా బేకరీలో పనికి కుదిరారు. ఇలా 16 ఏండ్లు గడిచిపోయాయి. మహేందర్ తల్లిదండ్రులు, స్వగ్రామాన్ని కూడా మర్చిపోయాడు.
ఈ క్రమంలోనే తల్లిదండ్రుల గురించి ఆలోచించడం మొదలుపెట్టాడు. వారి గురించి తెలుసుకోవాలనుకుని బేకరీ యజమాని సుశీల్ కుమార్ కు విషయం చెప్పాడు. దీంతో అతడు యూపీలో ఉంటున్న తన బంధువైన ఓ కానిస్టేబుల్కు సమాచామిచ్చాడు. ఎంక్వైరీ చేసిన ఆ కానిస్టేబుల్ అతడి తల్లిదండ్రుల వివరాలు సేకరించి తెలియజేశాడు. దీంతో వారు బెల్లంపల్లికి చేరుకొని కొడుకును కలుసుకున్నారు. చిన్ననాడు గొంతు కింద ఆపరేషన్ చేయగా ఏర్పడ్డ మచ్చను చూసి గుర్తు పట్టి సంబురపడిపోయారు. మహేందర్ను తీసుకొని తమ గ్రామానికి బయలుదేరివెళ్లారు.
