- ఫారెస్ట్ ఆఫీస్ ఎదుట కార్మికుల ధర్నా
భద్రాద్రికొత్తగూడెం, వెలుగు : తునికాకు సేకరణ టెండర్లను పూర్తి చేసి, ప్రూనింగ్ పనులను చేపట్టాలని డిమాండ్ చేస్తూ వ్యవసాయ కార్మిక సంఘం ఆధ్వర్యంలో బుధవారం కొత్తగూడెంలోని ఫారెస్ట్ ఆఫీస్ ఎదుట కార్మికులు ధర్నా చేశారు. ఈ సందర్భంగా సంఘం జిల్లా కార్యదర్శి ఆర్. శ్రీనివాస్ మాట్లాడుతూ తునికాకు సేకరణ టెండర్ల ప్రక్రియ పూర్తి కాకపోవడంతో ఇంకా ఆలస్యం అయితే క్వాలిటీ తునికాకు లభించదని ఆందోళన వ్యక్తం చేశారు.
సకాలంలో ప్రూనింగ్ పనులు జరిగితేనే నాణ్యమైన తునికాకు లభిస్తుందన్నారు. పెండింగ్లో ఉన్న తునికాకు బోనస్ను చెల్లించే విధంగా ఆఫీసర్లు చర్యలు తీసుకోవాలని కోరారు. అనంతరం అటవీశాఖాధికారికి వినతిపత్రం అందజేశారు. ఈ ప్రోగ్రాంలో నాయకులు శెట్టి వినోద, ఈసం నరసింహరావు, రాములు, జోగా దశరత్, ఎర్రయ్య పాల్గొన్నారు.
