తిరుమల శ్రీవారిని దర్శించుకోవాలని ఎదురుచూస్తున్న భక్తులకు టీటీడీ కీలక సమాచారం అందించింది. ఫిబ్రవరి నెలకు సంబంధించిన ఆర్జిత సేవలు, ప్రత్యేక దర్శనాలు, వర్చువల్ సేవలు, అంగప్రదక్షిణ టోకెన్లు, వసతి గదుల కోటాను విడతలవారీగా ఆన్లైన్లో విడుదల చేయనుంది. నవంబర్ 18 నుంచి 24వ తేదీ వరకు వివిధ సేవలు, దర్శనాలకు సంబంధించిన టికెట్లను అందుబాటులోకి తీసుకురానుంది. భక్తులు ఈ తేదీలు, సమయాలను ముందుగానే గమనించి టికెట్లు బుక్ చేసుకోవాలని టీటీడీ సూచిస్తోంది.
నవంబర్ 18న ఆర్జిత సేవల టికెట్ల విడుదల
ఫిబ్రవరి నెలకు సంబంధించి శ్రీవారి ఆర్జిత సేవల టికెట్ల కోటాను నవంబర్ 18న ఉదయం 10 గంటలకు టీటీడీ ఆన్లైన్లో విడుదల చేయనుంది. ఇందులో సుప్రభాతం, తోమాల, అర్చన, అష్టదళ పాదపద్మారాధన సేవలకు సంబంధించిన టికెట్లు ఉంటాయి. ఈ సేవల్లో పాల్గొనాలనుకునే భక్తులు ముందుగా ఎలక్ట్రానిక్ డిప్ విధానంలో వారి పేర్లను నమోదు చేసుకోవాలి. నవంబర్ 18న ఉదయం 10 గంటల నుంచి 20వ తేదీ ఉదయం 10 గంటల వరకు ఆన్లైన్లో నమోదు చేసుకునేందుకు అవకాశం ఉంటుంది. ఎలక్ట్రానిక్ డిప్లో టికెట్లు కేటాయించిన భక్తులు నవంబర్ 20వ తేదీ నుంచి 22వ తేదీ మధ్యాహ్నం 12 గంటలలోపు నిర్ణీత మొత్తాన్ని చెల్లించాలి. గడువులోగా డబ్బులు చెల్లించిన వారికి మాత్రమే టికెట్లు ఖరారు అవుతాయి.
నవంబర్ 21న ఇతర ఆర్జిత సేవల టికెట్లు
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవలకు సంబంధించిన టికెట్లను నవంబర్ 21న ఉదయం 10 గంటలకు టీటీడీ ఆన్లైన్లో విడుదల చేయనుంది. ఈ సేవల్లో పాల్గొనాలనుకునే భక్తులు టికెట్లు విడుదలైన వెంటనే అధికారిక వెబ్సైట్లో అందుబాటులో ఉన్న వివరాలను పరిశీలించి బుక్ చేసుకోవచ్చు.
వర్చువల్ సేవల కోటా కూడా అదే రోజు విడుదల
వర్చువల్ సేవలు చేయించుకోవాలనుకునే భక్తుల కోసం కూడా టీటీడీ ప్రత్యేక ఏర్పాట్లు చేసింది. ఫిబ్రవరి నెలకు సంబంధించిన వర్చువల్ సేవలు, వాటికి అనుసంధానమైన దర్శన స్లాట్ల కోటాను నవంబర్ 21న మధ్యాహ్నం 3 గంటలకు ఆన్లైన్లో విడుదల చేయనుంది. భక్తులు వారికీ అనుకూలమైన స్లాట్ను సెలెక్ట్ చేసుకునే అవకాశం ఉంటుంది.
నవంబర్ 23న అంగప్రదక్షిణ టోకెన్లు
శ్రీవారి ఆలయంలో అంగప్రదక్షిణ చేయాలనుకునే భక్తుల కోసం నవంబర్ 23న ఉదయం 10 గంటలకు టోకెన్ల కోటాను టీటీడీ విడుదల చేయనుంది. పరిమిత సంఖ్యలో అందుబాటులో ఉండే ఈ టోకెన్లను భక్తులు ఆన్లైన్లో పొందవచ్చు.
శ్రీవాణి దర్శన టికెట్ల విడుదల
శ్రీవాణి ట్రస్టుకు విరాళం అందించి శ్రీవారి దర్శనం చేసుకోవాలనుకునే భక్తుల కోసం నవంబర్ 23న ఉదయం 11 గంటలకు దర్శన టికెట్ల కోటాను విడుదల చేయనున్నారు. ఆసక్తి ఉన్న భక్తులు నిర్ణీత విధానంలో ఆన్లైన్ ద్వారా టికెట్లు పొందవచ్చు.
వృద్ధులు, దివ్యాంగులకు ఉచిత ప్రత్యేక దర్శనం
వయోవృద్ధులు, దివ్యాంగులు, దీర్ఘకాలిక వ్యాధులతో బాధపడుతున్న భక్తులు ఇబ్బందులు లేకుండా శ్రీవారిని దర్శించుకునేందుకు టీటీడీ ప్రత్యేక సదుపాయం కల్పిస్తోంది. వీరికి సంబంధించిన ఉచిత ప్రత్యేక దర్శనం టోకెన్ల కోటాను నవంబర్ 23న మధ్యాహ్నం 3 గంటలకు ఆన్లైన్లో విడుదల చేయనుంది. అర్హత కలిగిన భక్తులు ఈ టోకెన్లను వినియోగించుకుని ప్రత్యేక దర్శనం చేసుకోవచ్చు. టోకెన్ల కేటాయింపు, అర్హతలు, అవసరమైన ధ్రువపత్రాలకు సంబంధించిన నిబంధనలను ముందుగానే పరిశీలించుకోవడం మంచిది.
నవంబర్ 24న ప్రత్యేక ప్రవేశ దర్శన టికెట్లు
ఫిబ్రవరి నెలలో శ్రీవారిని దర్శించుకోవాలనుకునే సాధారణ భక్తుల కోసం ప్రత్యేక ప్రవేశ దర్శనం (రూ.300 దర్శనం) టికెట్ల కోటాను నవంబర్ 24న ఉదయం 10 గంటలకు టీటీడీ విడుదల చేయనుంది. టికెట్లు అందుబాటులోకి వచ్చిన తర్వాత భక్తులు వారికీ అనుకూలమైన తేదీ, సమయాన్ని సెలెక్ట్ చేసుకుని ఆన్లైన్లో బుక్ చేసుకోవచ్చు. ఈ టికెట్లకు డిమాండ్ ఎక్కువగా ఉండే అవకాశం ఉన్నందున ముందుగానే వెబ్సైట్లో సిద్ధంగా ఉండటం మంచిది.
తిరుమల, తిరుపతిలో గదుల కోటా విడుదల
దర్శన టికెట్లతోపాటు తిరుమల, తిరుపతిలో వసతి పొందాలనుకునే భక్తులకు కూడా టీటీడీ అవకాశం కల్పిస్తోంది. ఫిబ్రవరి నెలకు సంబంధించిన గదుల కోటాను నవంబర్ 24న మధ్యాహ్నం 3 గంటలకు ఆన్లైన్లో విడుదల చేయనుంది. తిరుమలలో లేదా తిరుపతిలో బస చేయాలనుకునే భక్తులు వారి ప్రయాణ తేదీలకు అనుగుణంగా అందుబాటులో ఉన్న గదులను సెలెక్ట్ చేసుకుని బుక్ చేసుకోవచ్చు.
భక్తులు గుర్తుంచుకోవాల్సిన ముఖ్యమైన తేదీలు
నవంబర్ 18, ఉదయం 10 గంటలు: సుప్రభాతం, తోమాల, అర్చన, అష్టదళ పాదపద్మారాధన సేవల ఎలక్ట్రానిక్ డిప్ నమోదు ప్రారంభం.
నవంబర్ 20, ఉదయం 10 గంటలు: ఎలక్ట్రానిక్ డిప్ నమోదు ముగింపు.
నవంబర్ 20 నుంచి 22, మధ్యాహ్నం 12 గంటలలోపు: డిప్లో టికెట్లు పొందిన వారు డబ్బులు చెల్లించాల్సిన గడువు.
నవంబర్ 21, ఉదయం 10 గంటలు: కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ టికెట్లు.
నవంబర్ 21, మధ్యాహ్నం 3 గంటలు: వర్చువల్ సేవలు, దర్శన స్లాట్లు.
నవంబర్ 23, ఉదయం 10 గంటలు: అంగప్రదక్షిణ టోకెన్లు.
నవంబర్ 23, ఉదయం 11 గంటలు: శ్రీవాణి దర్శన టికెట్లు.
నవంబర్ 23, మధ్యాహ్నం 3 గంటలు: వృద్ధులు, దివ్యాంగులు, దీర్ఘకాలిక వ్యాధిగ్రస్తుల ఉచిత ప్రత్యేక దర్శనం టోకెన్లు.
నవంబర్ 24, ఉదయం 10 గంటలు: ప్రత్యేక ప్రవేశ దర్శనం టికెట్లు.
నవంబర్ 24, మధ్యాహ్నం 3 గంటలు: తిరుమల, తిరుపతిలో వసతి గదుల కోటా.
అధికారిక వెబ్సైట్లోనే టికెట్లు బుక్ చేసుకోండి
శ్రీవారి ఆర్జిత సేవలు, దర్శన టికెట్లు, వసతి గదుల బుకింగ్ కోసం టీటీడీ అధికారిక వెబ్సైట్ను మాత్రమే వినియోగించాలని భక్తులకు సూచిస్తున్నారు. అధికారిక వెబ్సైట్: https://ttdevasthanams.ap.gov.in ఫిబ్రవరి నెలలో తిరుమల యాత్రకు వెళ్లాలని ప్లాన్ చేసుకుంటున్న భక్తులు టికెట్ల విడుదల తేదీలు, సమయాలను గుర్తుంచుకోవాలి. ఆన్లైన్లో టికెట్లు బుక్ చేసుకునే సమయంలో వ్యక్తిగత వివరాలను జాగ్రత్తగా నమోదు చేయాలి. అలాగే అనధికారిక వెబ్సైట్లు, మధ్యవర్తులను నమ్మి మోసపోకుండా టీటీడీ అధికారిక వెబ్సైట్ ద్వారానే బుకింగ్ చేసుకోవాలి.
