గోదావరిఖని, వెలుగు: పెద్దపల్లి జిల్లాలో రాజ్యాంగ నిర్మాత డాక్టర్ బీఆర్.అంబేద్కర్ విగ్రహాల ఏర్పాటుకు కలెక్టర్శ్రీహర్ష అడ్డుపడుతూ.. కుల వివక్ష చూపుతున్నారని ఆలిండియా అంబేద్కర్ యువజన సంఘం నాయకులు ఆరోపించారు. ఈ మేరకు రాష్ట్ర కార్మిక, ఉపాధి, గనుల శాఖ మంత్రి జి.వివేక్ వెంకటస్వామిని ఆదివారం హైదరాబాద్లోని ఆయన నివాసంలో కలిసి ఫిర్యాదు చేశారు.
సంఘం జాతీయ ఉపాధ్యక్షుడు మామిడిపల్లి బాపయ్య, రాష్ట్ర వర్కింగ్ ప్రెసిడెంట్ బొంకూరి మధు, ఉపాధ్యక్షుడు మైస రాజేశ్మాట్లాడుతూ.. ఈ ఏడాది ఏప్రిల్5 నుంచి14వ తేదీ వరకు జరిగిన బాబూ జగ్జీవన్ రామ్, అంబేద్కర్ జయంతి ఉత్సవాలకు సంబంధించి దరఖాస్తు ఇచ్చేందుకు వెళ్లిన దళిత నాయకులతో కలెక్టర్అవహేళనగా మాట్లాడారని అన్నారు.
ప్రధాన రహదారులపై కొత్తగా ఎలాంటి విగ్రహాలు పెట్టవద్దనే సర్క్యులర్ను చూపుతూ.. జిల్లాలో అంబేద్కర్ విగ్రహాలను పెట్టకుండా అడ్డుపడుతున్నారని తెలిపారు. దీనికి సుల్తానాబాద్ మండలం మంచెరామి గ్రామమే సాక్ష్యమని పేర్కొన్నారు. కలెక్టర్వ్యవహార శైలిని సీఎం రేవంత్ రెడ్డి దృష్టికి తీసుకెళ్లాలని మంత్రికి విన్నవించారు.
