పాట్నా: కాంగ్రెస్ అగ్రనేత రాహుల్ గాంధీ బీజేపీపై మరోసారి విమర్శల వర్షం కురిపించారు. బీజేపీ 50 ఏళ్లు అధికారంలో ఉంటుందని అమిత్ షా చెప్పడానికి కారణం ఓట్ చోరీనే అని ఆరోపించారు. ఓటర్ అధికార్ యాత్రలో భాగంగా బీహార్లోని మధుబనిలో రాహుల్ గాంధీ మాట్లాడుతూ.. దశాబ్దాల పాటు అధికారంలో ఉంటామనే బీజేపీ చెప్పడం వెనక ఓట్ చోరీ ముడిపడి ఉందని ఆరోపించారు.
‘40-50 సంవత్సరాల పాటు బీజేపీ అధికారంలో ఉంటుందని అమిత్ షా చాలాసార్లు చెప్పారు. అన్ని సంవత్సరాలు పవర్లో ఉంటామని ఆయనకు ముందే ఎలా తెలుసు..? ఈ విషయం నన్ను చాలా ఆలోచింపజేసింది. తీరా ఆరా తీస్తే దీని వెనక ఓట్ చోరీ ఉందనే సత్యం తెలిసింది’’ అని అన్నారు రాహుల్. 2017లో మధ్యప్రదేశ్‌లో పార్టీ కార్యకర్తలతో జరిగిన సమావేశంలో అమిత్ షా అమిత్ షా మాట్లాడుతూ.. మనం 5-10 సంవత్సరాలు అధికారంలో ఉండటానికి రాలేదని.. కనీసం 50 సంవత్సరాలు అధికారంలోకి ఉండటానికి వచ్చామని అన్నారు.
40-50 సంవత్సరాలలో అధికారం ద్వారా మనం దేశంలో పెద్ద మార్పులు తీసుకురావాలి అనే నమ్మకంతో ముందుకు సాగాలని పేర్కొన్నారు. రాహుల్ గాంధీ ఈ వ్యాఖ్యలను ప్రస్తావిస్తూ.. అమిత్ షా వ్యాఖ్యలతో బీజేపీ చోరీ చేస్తుందనే నిజం దేశం ముందు బయటపడిందని అన్నారు. దేశంలో ఓట్ చోరీ మొదట గుజరాత్‌లో ఆ తర్వాత 2014లో జాతీయ స్థాయికి చేరుకుంది. ఆపై ఇతర రాష్ట్రాలకు కూడా చేరుకుందని సంచలన వ్యాఖ్యలు చేశారు. నేను అబద్ధం చెప్పనని.. వాస్తవాల ఆధారంగానే మాట్లాడుతానని అన్నారు.
