హైదరాబాద్: 20 మంది ప్రాణాలను బలిగొన్న కర్నూల్ బస్సు ప్రమాద మిస్టరీ వీడింది. వేమూరి కావేరి ట్రావెల్స్ బస్సును బైక్ ఢీకొనడంతో మంటలు చెలరేగి ప్రమాదం చోటు చేసుకుందని మొదట అంతా భావించారు. కానీ ఈ ప్రమాదానికి కారణమైన బైకర్ శివ శంకర్ బండి వెనుకాల కూర్చున్న ఎర్రి స్వామిని పోలీసులు అదుపులోకి తీసుకుని విచారించగా అసలు విషయం బయపటడింది. బస్సు ప్రమాదానికి ముందే బైక్ డివైడర్ను ఢీకొట్టిందని.. దీంతో శివశంకర్, ఎర్రిస్వామి ఇద్దరు కిందపడ్డారని పోలీసులు తెలిపారు.
తీవ్రంగా గాయపడటంతో శివ శంకర్ అక్కడికక్కడే మృతి చెందగా.. ఎర్రిస్వామి స్వల్ప గాయాలతో బయటపడ్డాడు. డివైడర్ను ఢీకొట్టాక బైక్ రోడ్డు మధ్యలో పడిపోయింది. అదే సమయంలో వేమూరి కావేరి ట్రావెల్స్ బస్సు రోడ్డు పై ఉన్న బైక్ను ఢీకొని దాదాపు 300 మీటర్లు ఈడ్చుకెళ్లింది. ఈ క్రమంలో మంటలు చెలరేగా నిమిషాల్లోనే బస్సు అంతటా వ్యాపించి ఈ దుర్ఘటన చోటు చేసుకుందని తెలిపారు పోలీసులు.
ఈ ఘటనపై కర్నూల్ ఎస్పీ ప్రకటన విడుదల చేశారు. ‘‘వేమూరి కావేరి ట్రావైల్స్ బస్సు ప్రమాద ఘటన దర్యాప్తులో భాగంగా బైక్ నడుపుతూ చనిపోయినటువంటి శివశంకర్తో పాటు బైక్ వెనుకాల కూర్చున్న వ్యక్తి ఎర్రి స్వామిగా గుర్తించాము. అతన్ని పలు కోణాల్లో విచారించాము. ఎర్రిస్వామి, బైక్ నడుపుతున్న శివశంకర్ ఇద్దరు కలిసి లక్ష్మీపురం గ్రామం నుంచి అర్ధరాత్రి దాటిన తర్వాత సుమారు 2 గంటలకు బయలు దేరారు. ఎర్రిస్వామిని దింపడానికి తుగ్గలికి బయలు దేరాడు.
కియా షోరూం దగ్గర ఉన్న హెచ్పీ పెట్రోల్ బంక్ దగ్గర సుమారు అర్ధరాత్రి దాటిన తర్వాత 2.24 గంటలకు రూ. 300 పెట్రోల్ పట్టించుకుని బయలు దేరాడు. కొద్ది సేపటికి చిన్నటేకూరు సమీపంలో శివశంకర్ బైక్ నడుపుతూ స్క్రిడ్ అయి డివైడర్ను ఢీ కొట్టాడు. తీవ్ర గాయాలు కావడంతో బైక్ నడుపుతున్న శివశంకర్ అక్కడికక్కడే మృతి చెందాడు. వెనుకాల ఉన్న ఎర్రిస్వామి చిన్న గాయాలతో బయట పడ్డాడు.
ప్రమాద ఘటన స్ధలం దగ్గర రోడ్డు మధ్యలో నుండి శివశంకర్ను ఎర్రిస్వామి బయటికి లాగి శ్వాస చూడగా చనిపోయాడని నిర్ధారించుకున్నాడు. రోడ్డుపై పడి ఉన్న బైక్ను తీద్దామనుకునే సమయంలో బైక్ను వేమూరి కావేరి ట్రావెల్స్ బస్సు వచ్చి ఢీ కొట్టి కొద్ది దూరం ఈడ్చుకెళ్ళింది. బస్సు క్రింద మంటలు రావడంతో బయపడి ఎర్రిస్వామి తన సొంత ఊరైనా తుగ్గలికి బయలు దేరి వెళ్ళిపోయాడు’’ అని పోలీసులు వెల్లడించారు. ఈ ఘటనపై ఉలిందకొండ పోలీసులు కేసు నమోదు చేస్తున్నారు.
