- బయటకు వెళ్లనివ్వట్లేదంటూ సెల్ఫీ వీడియో పెట్టిన జడ్చర్ల కాంగ్రెస్ అభ్యర్థి
మహబూబ్నగర్, వెలుగు : జడ్చర్ల కాంగ్రెస్ అభ్యర్థి జనంపల్లి అనిరుధ్ రెడ్డిని పోలీసులు హౌస్అరెస్ట్ చేశారు. ఎన్నికల ప్రచారం మంగళవారం సాయంత్రం ముగియడంతో ఆయన హైదరాబాద్లోని తన ఇంటికి వెళ్లిపోయారు. ఈ క్రమంలో బుధవారం తెల్లవారుజామున ఆయన ఇంటిని పోలీసులు చుట్టుముట్టారు.
ఎవరిని ఇంట్లోకి వెళ్లనివ్వకుండా, అనిరుధ్ రెడ్డిని బయటకు వెళ్లకుండా కట్టడి చేశారు. ఈ సందర్భంగా అనిరుధ్ రెడ్డి తనను హౌస్ అరెస్ట్ చేశారంటూ సెల్ఫీ వీడియోను రిలీజ్ చేశారు. ఎన్నికల్లో ఓడిపోతాననే భయంతోనే బీఆర్ఎస్అభ్యర్థి సి.లక్ష్మారెడ్డి ఇలాంటి నీచ రాజకీయాలు చేస్తున్నారని ఆరోపించారు.
