సెప్టెంబర్ 14.. సౌదీ ఆరేబియాలోని ఆయిల్ప్లాంట్లపై డ్రోన్దాడులు జరిగిన రోజు. చిన్న డ్రోనులు ఉపయోగించి యెమన్ రెబల్స్ చేసిన అటాక్వల్ల భారీగా నష్టం వాటిల్లింది. సౌదీలో జరిగిన దాడులు.. ఇండియాలో ఎన్నో ప్రశ్నలను, అనుమానాలను రేకెత్తించాయి. దేశంలోకి ఎప్పుడెప్పుడు చొరబడాలా అని ఎదురుచూస్తున్న ఉగ్రవాదులు.. బాంబులతో డ్రోన్దాడులకు దిగితే ఏంటి పరిస్థితి? అటాక్ను ముందుగానే గుర్తించి అడ్డుకోలేమా? అనే ప్రశ్నల నేపథ్యంలో సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్ఎఫ్) ముందు జాగ్రత్తలకు దిగింది. దేశంలో సివిల్ ఎయిర్పోర్టులను సురక్షితంగా ఉంచేందుకు, డ్రోన్ దాడులను అడ్డుకునేందుకు యాంటీ డ్రోన్టెక్నాలజీని సిద్ధం చేసే పనిలో పడింది. ఇందుకోసం బ్లూ ప్రింట్ తయారు చేస్తోంది. ఐఐటీ బాంబే ఓల్డ్ స్టూడెంట్స్కు చెందిన ‘ఐడియా ఫోర్జ్’ అనే కంపెనీకి బ్లూప్రింట్రూపొందించే టాస్క్ అప్పజెప్పింది. ఈ ఏడాది చివరికల్లా పరిష్కారంతో రావాలని సూచించింది.
దాడులకు జైషే, లష్కరే ప్లాన్లు
జైషే మొహమ్మద్, లష్కరే తోయిబా వంటి టెర్రర్ సంస్థలు ఎల్ఈడీలు అమర్చిన డ్రోన్లతో ఎయిర్పోర్టులు, ఇతర ప్రభుత్వ సంస్థలపై దాడులు చేసే అవకాశం ఉందని ఇంటెలిజెన్స్ రిపోర్టులు హెచ్చరిస్తున్నాయి. గత మూడు నెలల్లో ఢిల్లీలోని రోహినీ ఏరియాలో కొందరు రెక్కీ నిర్వహించినట్లు కూడా సమాచారం అందింది. ఈ క్రమంలో వెస్ట్రన్, డొమెస్టిక్ యాంటీ డ్రోన్ మేకర్లను సీఐఎస్ఎఫ్ పరిశీలించింది. వాటి ఫీల్డ్ రిజల్ట్స్ విషయంలో సంతృప్తి చెందలేదు. సీఐఎస్ఎఫ్ పేర్కొన్న ప్రమాణాలు అవి అందుకోలేకపోవడమే ఇందుకు కారణం. తర్వాత డీఆర్డీవోతో కలిసి ఐడియా ఫోర్జ్ కంపెనీ తయారు చేసిన ‘నేత్ర’ డ్రోన్కు ఓకే చెప్పినట్లు తెలిసింది. ప్రస్తుతం తయారీ దశలో ఉన్న ఈ టెక్నాలజీ త్వరలోనే అందుబాటులోకి వచ్చే అవకాశం ఉంది.
