లైవ్ లో లైంగిక వేధింపులు, ముగ్గురు యువతులు హత్య అర్జెంటీనాలో సంచలనంగా మారింది. యువతులను లైంగికంగా వేధిస్తూ..అనంతరం హత్యను సోషల్మీడియాలో ప్రసారం చేయడం దేశవ్యాప్తంగా నిసనలకు దారితీసింది. ముగ్గురు యువతులకు న్యాయం చేయాలని డిమాండ్ చేస్తూ వేలాది మంది అర్జెంటీనా ప్రజలు బ్యూనస్ ఎయిర్స్ వీధుల్లో భారీ ర్యాలీ చేశారు.
హత్యకు గురైన మోరెనా, బ్రెండా డెల్ కాస్టిలో, లారా గుటియెర్రెజ్యువతులకు న్యాయం చేయాలని వేలాది మంది ప్రజలు పెత్త ఎత్తున వీధుల్లోకి వచ్చారు. లారా, బ్రెండా, మోరెనా ఫొటోలతో ప్లకార్డుల ప్రదర్శిస్తూ పార్లమెంట్ వరకు భారీ ర్యాలీ నిర్వహించారు. ఇది నార్కో స్త్రీ హత్య,మా జీవితాలు వాడి పారేయలేనివి అని రాసి ఉన్న ప్లకార్డులు పట్టుకొని మహిళలు నిరసనలు తెలిపారు.
అసలేం జరిగిందంటే..
సెప్టెంబర్ 19న పార్టీ పేరు చెప్పి మోరెనా, బ్రెండా డెల్ కాస్టిలో, లారా గుటియెర్రెజ్ లను నమ్మించి ఓ వ్యాన్ లో కిడ్నాప్ చేశారు నిందితులు. ముగ్గురు యువతులను వేళ్లు నరికి, గోళ్లు తీసి, దారుణంగా చంపేశారు. ఈ దారుణానికి పాల్పడుతూ సోషల్ మీడియా ఇన్ స్టాగ్రామ్ లో లైవ్ పెట్టారు. ఇది దేశవ్యాప్తంగా సంచలనంగా మారింది.
సెప్టెంబర్ 24న బుధవారం ముగ్గురు యువతులమృతదేహాలను బ్యూనర్ ఎయిర్స్ లోని దక్షిణ శివారులో ఓ ఇంట్లో పాతిపెట్టినట్టు గుర్తించారు. మృతులకు మాదక ద్రవ్యాల విక్రయించే ముఠాతో సంబంధం ఉన్నట్లు ..ముఠా రూల్స్ బ్రేక్ చేస్తే ఇలాగే ఉంటుంది.. మా నుంచి డ్రగ్స్ ఎవరూ దొంగిలించలేరంటూ ఈ దారుణానికి పాల్పడిన దుండగుల్లో ఒకరు లైవ్ లో చెప్పినట్లు తెలుస్తోంది.
ఈ కేసులో ఇప్పటివరకు ఐదుగురు నిందితులను అరెస్ట్ చేశారు పోలీసులు. నిందుతుల్లో ముగ్గురు యువకులు, ఇద్దరు యువతులు ఉన్నట్లు తెలుస్తోంది. శుక్రవారం బొలివియాలో మరో నిందితుడిని అరెస్ట్ చేశారు. ప్రధాన నిందితుడుగా భావిస్తున్న 20 యేళ్ల పెరువియన్కోసం పోలీసులు గాలింపు చర్యలు చేపట్టారు.
అయితే చనిపోయిన ముగ్గురు యువతులకు మాదకద్రవ్యాలు, వేశ్యవృత్తికి సంబంధం ఉన్నట్లు వస్తున్న ఆరోపణలు వారి కుటుంబ సభ్యులు తోసిపుచ్చారు. నిజాలు బయటపెట్టి తమకు న్యాయం చేయాలని నిరసనలకు దిగారు.
ఈ దారుణమైన కేసు అర్జెంటీనా దేశవ్యాప్తంగా స్త్రీ హత్య,లింగ వివక్ష,హింసపై ఆగ్రహాన్ని రేకెత్తించింది. మహిళల రక్షణ, నిందితులకు కఠిన శిక్ష విధించాలని నిరసనకారులు డిమాండ్ చేస్తున్నారు.
