కరోనా వ్యాక్సిన్ వేసుకోకుంటే ఇంట్లకెళ్లి బయటకు రావొద్దని ఆస్ట్రియా ప్రభుత్వం ఆర్డర్ వేసింది. ఇలాంటి వారిపై దేశవ్యాప్తంగా లాక్డౌన్ విధిస్తున్నట్లు తెలిపింది. సోమవారం అర్ధరాత్రి నుంచి ఈ నెల 24 వరకు అమలులో ఉంటుందని పేర్కొంది. దీనిని కూడా నిర్లక్ష్యం చేస్తే కఠిన చర్యలు తీసుకుంటామని ప్రజలను హెచ్చరించింది. వ్యాక్సిన్ వేసుకోకున్నా అనవసరంగా రోడ్లపైకి వచ్చే వారిని గుర్తించి పోలీసులు వారికి 1,450 యూరోల(మన రూపాయల్లో 1.24 లక్షలు) ఫైన్ వేస్తారని వివరించింది. దేశంలో ఓవైపు కేసులు పెరుగుతుండడంతో ఈ కఠిన నిర్ణయం తీసుకున్నట్లు వెల్లడించింది. తొంభై లక్షలకు పైగా జనాభా ఉన్న ఆస్ట్రియాలో 65% మంది కరోనా వ్యాక్సిన్ వేసుకున్నారని ప్రభుత్వం తెలిపింది. మిగతా వారినీ వ్యాక్సిన్ వేసుకునేలా ప్రోత్సహించేందుకే ఈ నిర్ణయం తీసుకున్నట్లు వివరించింది.
తాజా ఆదేశాల ప్రకా రం.. 12 ఏండ్లు పైబడిన వాళ్లు ఇప్పటికీ వ్యాక్సిన్ వేసుకోకుంటే ఇళ్లు వదిలి బయటకు రావొద్దు. ఆఫీసులకు వెళ్లడానికి, నిత్యావసర వస్తువుల కొనుగోలుకు, వాకింగ్కు, వ్యాక్సిన్ వేయించుకోవడానికి బయటకు వెళ్లొచ్చని మినహాయింపు ఇచ్చింది. దేశంలో 12 ఏండ్లలోపు పిల్లలకు ఇంకా వ్యాక్సిన్ వేయట్లేదు కాబట్టి పిల్లలకు ఈ రూల్నుంచి మినహాయింపు ఇస్తున్నట్లు పేర్కొంది. కాగా, ప్రభుత్వ నిర్ణయంపై ప్రతిపక్ష నేత హెర్బర్ట్ కికిల్మండిపడ్డారు. దాదాపు 20 లక్షల మంది ప్రజలు(వ్యాక్సిన్ వేసుకోనోళ్లు) ఏ తప్పూ చేయకున్నా హౌస్ అరెస్ట్లో ఉండాల్సి వస్తుందని ఆందోళన వ్యక్తం చేశారు. ప్రభుత్వ నిర్ణయంపై లీగల్గా, పార్లమెంట్లో పోరాడుతామని స్పష్టం చేశారు.
