- ఆటోమొబైల్ ఎగుమతులు 28% డౌన్
- కొన్ని దేశాల ఫైనాన్షియల్ మార్కెట్లలో ఇబ్బందులు
- కరెన్సీ విలువ తగ్గుదల
న్యూఢిల్లీ : ఆఫ్రికాతోపాటు ఇతర అభివృద్ధి చెందుతున్న దేశాల ఫైనాన్షియల్ మార్కెట్లు దెబ్బతినడంతో ఈ ఏడాది ఏప్రిల్–-జూన్ కాలంలో మనదేశం నుంచి ఆటోమొబైల్ ఎగుమతులు 28 శాతం తగ్గాయి. సియామ్ లెక్కల ప్రకారం.. జూన్ 30, 2023తో ముగిసిన మొదటి క్వార్టర్లో మొత్తం ఎగుమతులు 10,32,449 యూనిట్లు కాగా, గత ఏడాది ఇదే కాలంలో 14,25,967 యూనిట్లుగా రికార్డయ్యాయి. మొదటి క్వార్టర్లో అన్ని వెహికల్స్ విభాగాల ఎగుమతుల్లో తగ్గుదల కనిపించింది. ఆఫ్రికాతోపాటు ఇతర అభివృద్ధి చెందుతున్న దేశాలలో కరెన్సీల విలువ తగ్గిందని సొసైటీ ఆఫ్ ఇండియన్ ఆటోమొబైల్ మాన్యుఫ్యాక్చరర్స్ (సియామ్) డీజీ రాజేష్ మీనన్ చెప్పారు. ఈ దేశాలు విదేశీ మారకద్రవ్యం సమస్యలను ఎదుర్కొంటున్నాయి. అందుకే వెహికల్స్ అమ్మకాలు తక్కువగా ఉంటున్నాయి.
ALSO READ :ప్రతిపక్షాల భేటీకి హాజరైతం: ఆప్
ఇవి వెహికల్స్ను తక్కువగా కొంటూ, అత్యవసర వస్తువుల దిగుమతులపై ఎక్కువ దృష్టి సారిస్తున్నాయి. అయినప్పటికీ ఈ మార్కెట్లలో వెహికల్స్కు డిమాండ్ ఉందని మీనన్ చెప్పారు. ప్రస్తుత ఆర్థిక సంవత్సరం జూన్ క్వార్టర్లో మొత్తం ప్యాసింజర్ వెహికల్స్ ఎగుమతులు 1,52,156 యూనిట్లుగా కాగా, 2022 ఏప్రిల్–-జూన్ కాలంలో ఇవి 1,60,116 యూనిట్లు. అంటే ఎగుమతులు ఐదుశాతం తగ్గాయి. ప్యాసింజర్ కార్ల షిప్‌‌‌‌‌‌‌‌‌‌‌‌‌‌‌‌మెంట్లు 1,04,400 యూనిట్ల నుంచి 94,793 యూనిట్లకు పడిపోయాయి. యుటిలిటీ వెహికల్స్ షిప్‌‌‌‌‌‌‌‌‌‌‌‌‌‌‌‌మెంట్లు ఈ ఆర్థిక సంవత్సరం మొదటి క్వార్టర్లో 55,419 యూనిట్లకు తగ్గాయి. గత ఏడాది ఇదే కాలంలో 55,547 యూనిట్లు ఉన్నాయి. జూన్ క్వార్టర్లో 62,857 యూనిట్ల షిప్‌‌‌‌‌‌‌‌‌‌‌‌‌‌‌‌మెంట్లతో మారుతీ సుజుకి ఇండియా మొదటిస్థానాన్ని దక్కించుకుంది. ఈ కంపెనీ గత ఆర్థిక సంవత్సరం ఏప్రిల్–-జూన్ క్వార్టర్లో 68,987 ప్యాసింజర్ వెహికల్స్ను ఎగుమతి చేసింది. హ్యుందాయ్ మోటార్ ఇండియా మొదటి క్వార్టర్లో 34,520 యూనిట్లను రవాణా చేసింది.
