ముంబై: ఛత్రపతి శివాజీ మహరాజ్ ఉపయోగించిన 'వాఘ్ నఖ్' అనే ప్రత్యేక ఆయుధాన్ని త్వరలో లండన్నుంచి మహారాష్ట్రకు తీసుకురానున్నారు. ఇందుకోసం మహారాష్ట్ర సర్కారు ప్రయత్నాలు చేస్తున్నది. వాఘ్ నఖ్ అనేది పులి గోర్ల ఆకారంలో ఉండే ఇనుప ఆయుధం.1659లో బీజాపూర్ సుల్తాన్ అఫ్జల్ ఖాన్‌ను చంపడానికి ఛత్రపతి శివాజీ మహరాజ్ దీనిని ఉపయోగించారు.
ఇది ప్రస్తుతం లండన్‌లోని విక్టోరియా ఆల్బర్ట్ మ్యూజియంలో ఉంది. నవంబర్‌లో దాన్ని మహారాష్ట్రకు తీసుకొచ్చే అవకాశం ఉందని ఆ రాష్ట్ర సాంస్కృతిక శాఖ మంత్రి సుధీర్ ముంగంటివార్ శుక్రవారం తెలిపారు. ఇందుకోసం ముంగంటివార్ ఈ నెలాఖరులో యూకే వెళ్లనున్నారు. శివాజీ మహరాజ్ అఫ్జల్ ఖాన్‌ను హతమార్చిన రోజైన నవంబర్ 10న దానిని తీసుకురావడానికి ప్రయత్నం చేస్తున్నామని మంత్రి తెలిపారు.
