- రెండు ఎలక్ట్రానిక్ షాప్ లపై బాలానగర్ ఎస్ వోటీ దాడులు
- రూ.46.20లక్షల 154 ఎల్ఈడీలు స్వాధీనం
- ఇద్దరు వ్యాపారులు అరెస్ట్
జీడిమెట్ల, వెలుగు: టీవీల విడిభాగాలతో ఎల్ఈడీలను తయారు చేసి వాటికి బ్రాండెడ్ కంపెనీల ట్యాగ్ లు, స్టిక్కర్లు, లోగోలు అటాచ్ చేసి అమ్ముతున్న రెండు ఎలక్ట్రానిక్స్ షాప్ లపై బాలానగర్ ఎస్ వోటీ జోన్, జీడిమెట్ల పోలీసులు దాడులు చేసి ఇద్దరు వ్యాపారులను అరెస్ట్ చేశారు. వీరు ఇతర రాష్ట్రాలకు సైతం డూప్లికేట్ టీవీలను బ్రాండెడ్ కంపెనీల పేరుతో సప్లయ్ చేసి అమ్ముతున్నట్టు పోలీసులు గుర్తించారు.
ఈ దాడుల్లో రూ.46లక్షల20 వేలు విలువ చేసే వివిధ కంపెనీలకు చెందిన 154 ఎల్ఈడీలను స్వాధీనం చేసుకున్నారు. పోలీసుల క థనం ప్రకారం… జీడిమెట్ల సుభాష్నగర్ కృష్ణమూర్తినగర్కి చెందిన బాలమురుగన్ సుబ్రమణ్యం అలియాస్ బాలు (39), కొంపల్లి గార్డెన్ హౌజింగ్ సోసైటీ లోని లిల్లి అపార్ట్ మెంటులో ఉండే హసమ్ హసన్ పర్మార్(65) ఇద్దరు షాపూర్నగర్లోని మార్కెట్లో మహశక్తి ఎలక్ర్టానిక్స్ , హెచ్.ఎన్. ఎలక్ట్రానిక్స్ పేరుతో పక్క పక్కనే దుకాణాలు నిర్వహిస్తున్నారు. 20 ఏండ్లుగా ఈ ఇద్దరు అమాయక వినియోగదారులే లక్ష్యంగా డూప్లికేట్ టీవీలను అమ్ముతున్నారు. డూప్లికేట్ టీవీలలో సాఫ్ట్ వేర్లు వేసి ప్రముఖ బ్రాండ్లైన సోనీ, ఎల్జీ, సామ్సంగ్, ఐవా, తోషిబా బ్రాండ్ పేర్ల లోగోలు, స్టిక్కర్లను తగిలించి అమ్ముతున్నారు. కేవలం షాపూర్నగర్లోనే కాకుండా దేశంలోని తమిళనాడు, కేరళ, గుజరాత్ రాష్ట్రాలకు ఈ టీవీలను సప్లయ్ చేస్తున్నారు.
ఈ విషయం తెలుసుకున్న జీడిమెట్ల పోలీసులు, బాలానగర్ ఎస్ వోటీ అధికారులు ఆదివారం సాయంత్రం దాడులు చేశారు. ఈ దాడుల్లో రూ.46.20లక్షల విలువచేసే 154 ఎల్ఈడీ టీవీలను స్వాధీనం చేసుకున్నారు. ఇందులో 32 ఇంచెస్ టీవీలు 79, 24 ఇంచెస్టీవీలు 15, 40 ఇంచెస్ టీవీలు 54, 50 ఇంచెస్ 4, 55ఇంచెస్ 2 ఉన్నాయి. వీటితోపాటు సోని, ఎల్జీ, సామ్సంగ్, సాన్సూయి, తోషిబా, ఐవా, సన్రైజ్, హైవా, తామ్సన్, జేబీఎల్ స్టికర్లు, 7 ప్రోగ్రామింగ్ పెన్డ్రైవ్లను పోలీసులు స్వాధీనం చేసుకున్నారు. ఇద్దరు వ్యాపారులు బాలమురుగన్, హసన్ ను అరెస్ట్ చేశారు. ఈ కేసును ఛేదించడంలో కీలక పాత్ర వహించిన బాలానగర్ ఎస్ఓటీ జోన్ ఇన్స్పెక్టర్ సుధీర్,ఎస్ఐ వెంకటేశ్వర్లు, ఎస్సై సంజీవ్, హెచ్సీ రాజు, పీసీ ముకుందం, బాలానగర్ సీఐ రమణారెడ్డి,ఎస్సై విశ్వనాథ్, ఎస్ఓటీ స్టాఫ్ నర్సిరెడ్డి, నర్సింహ, శ్రీనివాస్రెడ్డికి అవార్డు కోసం రికమండ్ చేస్తామని ఉన్నతాధికారులు తెలిపారు.