- హైదరాబాద్ వెళ్లేందుకు అర్ధరాత్రి
- గోడ దూకి బయటకు వచ్చిన 35 మంది
- హాస్టల్కు తరలించిన పోలీసులు
- ఫ్యాకల్టీని నియమించిన విషయం తెలియకే బయటికొచ్చారన్న ప్రిన్సిపాల్
బెల్లంపల్లి రూరల్, వెలుగు : సబ్జెక్ట్ టీచర్స్ కొరతపై మంత్రి, ఆఫీసర్లను కలవాలన్న ఉద్దేశంతో పలువురు స్టూడెంట్లు అర్ధరాత్రి హాస్టల్ గోడ దూకి రైల్వేస్టేషన్ కు చేరుకున్నారు. గమనించిన వార్డెన్ పోలీసులకు సమాచారం ఇవ్వడంతో వారు స్టూడెంట్లకు నచ్చజెప్పి హాస్టల్ కు పంపించారు.
ఈ ఘటన మంచిర్యాల జిల్లా బెల్లంపల్లిలోని సెంటర్ఆఫ్ఎక్స్లెన్స్(సీవోఈ)లో సోమవారం జరిగింది. బెల్లంపల్లి సీవోఈలో ఫిజిక్స్, జువాలజీ సబ్జెక్టు టీచర్లతో పాటు జేఈఈ బోధించే ఫ్యాకల్టీని నియమించకపోవడంతో చదువులు ఇబ్బందిగా మారాయి.
ఈ విషయంపై జిల్లా ఆఫీసర్లను కలిసినా ఫలితం లేకపోవడంతో స్టూడెంట్లు మూకుమ్మడిగా హైదరాబాద్ కు వెళ్లి మంత్రి, అధికారులను కలవాలని నిర్ణయించుకున్నారు. ఆదివారం రాత్రి 35 మంది స్టూడెంట్లు హాస్టల్ గోడ దూకి బయటకు వచ్చారు.
బెల్లంపల్లి రైల్వేస్టేషన్ కు చేరుకొని భాగ్యనగర్ ఎక్స్ప్రెస్ద్వారా హైదరాబాద్కు వెళ్లేందుకు రెడీ అయ్యారు. విద్యార్థులు బయటకు వెళ్లిన విషయం తెలుసుకున్న వార్డెన్ పోలీసులకు సమాచారం ఇచ్చారు. దీంతో వారు రైల్వేస్టేషన్కు చేరుకొని, స్టూడెంట్స్తో మాట్లాడి సమస్య పరిష్కారం కోసం చొరవ తీసుకుంటామని హామీ ఇచ్చి వారిని తిరిగి హాస్టల్కు తరలించారు.
ఈ విషయంపై ప్రిన్సిపాల్విజయ్కుమార్ను సంప్రదించగా.. సబ్జెక్ట్ టీచర్స్ ను నియమిస్తూ శనివారమే ఆర్డర్స్వచ్చాయని, వారు సోమవారం ఉదయం జాయిన్అయ్యారని తెలిపారు. ఈ విషయం తెలియకనే విద్యార్థులు బయటకు వచ్చారని చెప్పారు.
