యూఎస్‌‌ ఓపెన్‌‌ గ్రాండ్‌‌స్లామ్‌‌ లో అల్కరాజ్‌‌ కు షాక్‌‌.. క్వార్టర్‌‌ ఫైనల్లోనే నిష్క్రమించిన కార్లోస్‌‌

• బెన్‌‌ షెల్టన్‌‌ సంచలన విజయంతో సెమీస్‌‌కు
• సబలెంక, పెగులా, రిబకినా కూడా..

న్యూయార్క్‌‌:  యూఎస్‌‌ ఓపెన్‌‌ గ్రాండ్‌‌స్లామ్‌‌లో పెను సంచలనం నమోదైంది. స్పెయిన్‌‌ స్టార్‌‌ ప్లేయర్‌‌, డిఫెండింగ్‌‌ చాంపియన్‌‌ కార్లోస్‌‌ అల్కరాజ్‌‌ క్వార్టర్‌‌ ఫైనల్లోనే ఇంటిముఖం పట్టాడు. మంగళవారం అర్ధరాత్రి జరిగిన మెన్స్‌‌ సింగిల్స్‌‌ మ్యాచ్‌‌లో ఎనిమిదో సీడ్‌‌ బెన్‌‌ షెల్టన్‌‌ (అమెరికా) 6–7 (5/7), 6–1, 6–3, 1–6, 7–6 (10/7)తో రెండోసీడ్‌‌ అల్కరాజ్‌‌పై గెలిచి సెమీస్‌‌లోకి ప్రవేశించాడు. ఫలితంగా గ్రాండ్‌‌స్లామ్స్‌‌లో అల్కరాజ్‌‌ 18 వరుస విజయాలకు బ్రేక్‌‌ పడింది. 4 గంటలా 28 నిమిషాల మ్యాచ్‌‌లో షెల్టన్‌‌ గంటకు 146 మైళ్ల వేగంతో కొట్టిన ఏస్‌‌ను అల్కరాజ్‌‌ కనీసం టచ్‌‌ కూడా చేయలేకపోయాడు. 

షెల్టన్‌‌కు ఇది మూడో మేజర్‌‌ సెమీస్‌‌ కావడం విశేషం. 2023 యూఎస్‌‌, 2025 ఆస్ట్రేలియన్‌‌ ఓపెన్‌‌లో సెమీస్‌‌కు చేరాడు. ఇక అల్కరాజ్‌‌తో జరిగిన ఈ మ్యాచ్‌‌లో రెండో సెట్‌‌ ప్రారంభం నుంచి వరుసగా తొమ్మిది గేమ్‌‌లు గెలిచి మూడో సెట్‌‌లో 3–0 ఆధిక్యంలో నిలిచాడు. టైబ్రేక్‌‌లో వరుసగా నాలుగు పాయింట్లు సాధించిన అల్కరాజ్‌‌ 5–3 ఆధిక్యంలోకి వెళ్లాడు. కానీ చివర్లో చేసిన తప్పుల వల్ల మ్యాచ్‌‌ను చేజార్చుకున్నాడు. 

ఐదు సెట్ల మ్యాచ్‌‌లో అల్కరాజ్‌‌ రికార్డు ప్రస్తుతం 15–2గా ఉంది. మరో క్వార్టర్స్‌‌లో ఫ్రాన్సెస్‌‌ తియాఫో (అమెరికా) 5–7, 3–6, 7–5, 6–3, 7–6 (10/6)తో అలెక్స్‌‌ మిచెల్‌‌సన్‌‌ (అమెరికా)పై గెలిచి సెమీస్‌‌కు సిద్ధమయ్యాడు. విమెన్స్‌‌ క్వార్టర్‌‌ఫైనల్లో టాప్‌‌సీడ్‌‌ అరీనా సబలెంక (బెలారస్‌‌) 7–6 (7/1), 3–6, 7–6 (10/7)తో లిండా నోస్కోవా (చకియా)పై, మూడోసీడ్‌‌ జెస్సికా పెగులా (అమెరికా) 3–6, 6–4, 6–3తో ఎమ్మా నవారో (అమెరికా)పై , రెండోసీడ్‌ రిబకినా (కజకిస్తాన్‌) 3–6, 6–1, 6–4తో క్వినెన్‌ జెంగ్‌ (చైనా)పై గెలిచి సెమీస్‌లోకి అడుగుపెట్టారు.