అల్వాల్, వెలుగు: తాను ఎంతో ఇష్టపడి పెంచుకుంటున్న కుక్క చనిపోయిందనే మనస్థాపంతో ఓ డిగ్రీ స్టూడెంట్ సూసైడ్ చేసుకున్నాడు. అల్వాల్ పీఎస్ పరిధిలో ఈ ఘటన జరిగింది. అల్వాల్ రిట్రీట్ కాలనీలో ఉండే నారాయణ హోటల్ మేనేజ్ మెంట్ కాలేజీ చైర్మన్ లక్ష్మీనారాయణకు ఇద్దరు కొడుకులు. చిన్న కొడుకు విష్ణు నారాయణ(20) పంజాగుట్టలోని ఓ కాలేజీలో డిగ్రీ ఫైనలియర్ చదువుతున్నాడు. విష్ణు పెంచుకుంటున్న కుక్క 3 నెలల కిందట మృతి చెందింది. అప్పటి నుంచి విష్ణు మనస్థాపంతో ఉంటున్నాడు. సోమవారం అర్ధరాత్రి ఇంట్లో గదిలోకి వెళ్లి డోర్వేసుకుని ఫ్యాన్కు ఉరేసుకున్నాడు.
కుటుంబసభ్యులు మంగళవారం ఉదయం అతడి రూమ్ డోర్ తెరిచి లోపలికి వెళ్లి చూడగా విష్ణు ఫ్యాన్కు వేలాడుతూ కనిపించాడు. పెంపుడు కుక్క చనిపోవడంతో మనోవేదనకు గురై ఆత్మహత్య చేసుకున్నాడని కుటుంబ సభ్యులు ఇచ్చిన ఫిర్యాదు మేరకు పోలీసులు కేసు ఫైల్ చేశారు. విష్ణు రాసిన సూసైడ్ నోట్ను స్వాధీనం చేసుకుని దర్యాప్తు చేస్తున్నారు.
