- కాంట్రాక్టర్ మరణంతో నిలిచిన ప్రాజెక్ట్
- తొలి సోలార్ టెంపుల్కు మధ్యలోనే అడ్డంకులు
భద్రాచలం, వెలుగు: భద్రాచలం రామాలయంలో సోలార్ పవర్ ప్రాజెక్ట్కు బ్రేక్ పడింది. ప్రాజెక్ట్ను చేపట్టిన సన్ టెక్నాలజీస్ సంస్థ కాంట్రాక్టర్ రెండు నెలల కింద అనారోగ్యంతో చనిపోయారు. దీంతో ప్రాజెక్టు మధ్యలోనే నిలిచిపోయింది. తెలంగాణలోనే తొలి సోలార్ టెంపుల్గా భద్రాచలం శ్రీ సీతారామచంద్ర స్వామి దేవస్థానాన్ని చరిత్రకెక్కించాలనుకున్న ఆఫీసర్ల ఆశలు అడియాశలు అయ్యాయి. తెలంగాణ ఆర్టీసీ సంస్థకు రాష్ట్రంలోని అన్ని బస్ డిపోల్లో ఈ సన్ టెక్నాలజీస్ సంస్థే సోలార్ సిస్టమ్స్ ఏర్పాటు చేసింది. ఈ సంస్థతోనే శ్రీ సీతారామచంద్ర స్వామి దేవస్థానం అగ్రిమెంట్ చేసుకుంది. సడన్గా కాంట్రాక్టర్ చనిపోవడంతో ప్రాజెక్ట్ ఆగిపోయింది.
మూడేండ్ల కింద మొదలు..
రామాలయానికి సోలార్ వెలుగులు ఇచ్చేందుకు సన్ టెక్నాలజీస్ సంస్థ మూడేండ్ల కింద దేవస్థానం ఆఫీసర్లను కలిసింది. ఈఈ రవీందర్కు సన్నిహితుడైన కాంట్రాక్టర్ తక్కువ ఖర్చుతోనే 25 ఏండ్ల పాటు ఒకే ధరకు సోలార్ లైటింగ్ ఇచ్చేందుకు ముందుకొచ్చారు. అయితే ఎండోమెంట్ కమిషనర్ పర్మిషన్ కోసం ఒక ఏడాది, అగ్రిమెంట్లు ఇతరత్రా విషయాలకు మరో ఏడాది, మూడేండ్ల తర్వాత 2022 నవంబర్లో పనులు షురూ అయ్యాయి. జార్ఖండ్ నుంచి వచ్చిన సంస్థ ముగ్గురు టెక్నీషియన్లు సోలార్ ప్లేట్లు అమర్చారు. మొత్తం 27 కాటేజీలు, 140 రూములు, రామాలయం, నిత్యాన్నదాన సత్రం ఇలా అన్ని చోట్ల 300 కిలోవాట్ల మేర విద్యుత్ ఇచ్చేందుకు ఏర్పాట్లు చేశారు.
160 కిలోవాట్ల పనులు జరిగాక సంస్థ కాంట్రాక్టర్ అనారోగ్యంతో చనిపోవడంతో పనులు నిలిపివేశారు. నెల రోజుల నుంచి పనులు జరగడం లేదు. ఈ ప్రాజెక్టు ద్వారా 10 కిలోవాట్ల వరకు యూనిట్కు రూ.5.80లు, 11 వాట్ల నుంచి 100 కిలోవాట్ల వరకు యూనిట్కు రూ.5.50లు, 100 కిలోవాట్లపైన వాడితే యూనిట్కు రూ.4.80లు సంస్థకు దేవస్థానం చెల్లించేలా అగ్రిమెంట్ జరిగింది. ప్రాజెక్టు ఖర్చు మొత్తం సంస్థదే. బిల్లులు మాత్రమే దేవస్థానం చెల్లిస్తుంది. శ్రీ సీతారామచంద్ర స్వామి దేవస్థానం నెలకు రూ.7లక్షలకు పైగా కరెంట్ బిల్లులు కడుతోంది. సంవత్సరానికి రూ.84లక్షలు పవర్ బిల్లులకే ఖర్చు అవుతోంది. సోలార్ పవర్ ప్రాజెక్టు ద్వారా 40శాతం బిల్లులు దేవస్థానానికి ఆదా అవుతాయి. కానీ ప్రస్తుతం ప్రాజెక్టు ఆగిపోవడంతో కాంట్రాక్టు నిలిచిపోయింది.
సంస్థతో సంప్రదింపులు..
కాంట్రాక్టు అగ్రిమెంట్ చేసుకున్న సంస్థతో సంప్రదింపులు జరుపుతున్నాం. ప్రాజెక్టు రెండు నెలల కింద ఆగిపోయింది. అగ్రిమెంట్ చేసుకున్న కాంట్రాక్టర్ అనారోగ్యంతో చనిపోయారు. మిగిలిన పనులు ఆ సంస్థతోనే చేయించేలా ప్రయత్నిస్తున్నాం. ఇప్పటి వరకు సగం పనులు జరిగాయి.
- రవీందర్రాజ్, ఈఈ, శ్రీ సీతారామచంద్ర స్వామి దేవస్థానం
